اطلاعات روز: د سولې په چارو کې د دولت وزیر سید منصور سادات نادري وایي، طالبانو ډله د جګړې او زور له لارې واک ته نه شي رسېدلی.
سیدمنصور سادات نادري دغه څرګندونې نن (پنج شنبه، ۲۸ د غبرګولي) ننګرهار کې د دولت وزارت له لوري ختیځ لپاره د یاد وزارت د دفتر په پرانستغونډه کې چې ولایتي چارواکو، مدني فعالانو او لسګونه ولسي خلکو ګډون کړی وو، وکړې.
غونډې ته په خبرو کې د سولې په چارو کې د دولت وزیر سید منصور سادات نادري د سولې په برخه کې د دا شان دفترونو پرانیستل کېدل مهم وبلل او ویې ویل، له دې لارې به وکولی شي د ولسي خلکو له راټولو شویو نظریاتو د سولې په مذاکراتو کې ګټه واخلي.
نادري په افغانستان کې د سولې رامنځته کیدل د سیمې د هیوادونو په ګټه بولي. نوموړي پر وسله والو طالبانو غږ وکړ، چې هېڅکله به د زور او جګړې له لارې واک ترلاسه نه کړي.
نادري زیاته کړه: «په افغانستان کې امنیت د سیمې د هیوادونو په ګټه دی، نو په کار ده چې ګاونډي او د سیمې نور هیوادونه په دې برخه کې رښتیني همکاري وکړي، ترڅو وکولای شو چې افغانستان کې سوله راشي او پر طالبانو هم غږ کوو چې تاسې د زور له لارې هیڅ وخت واک ته نه شئ رسېدلی، ترڅو چې سوله ونه کړې، نو لازمه ده چې باید طالبان د سولې خبرو ته کېنئ څو روان بحران پای ته ورسیږي.»
غونډې ته په وینا کې د ننګرهار والي ضیاالحق امرخیل وویل، له کله راهیسې چې له هیواده د بهرنیو ځواکونو وتل پیل شوي ورسره سم په ټولو ولایتونو د وسله والو طالبانو له لوري جګړو زور اخیستې.
امرخیل د هیواد اوسنی وضعیت اندیښمنونکی وباله او پر حکومت یې غږ وکړ، چې د سولې په ټپه دریدلې خبرې دې ګړندۍ کړي، څو روانه جګړه پای ومومي.
امرخیل زیاتوي: «متاسفانه له کله راهیسې چې د بهرنیانو وتل پیل شوي په ټولو ولایتونو کې وسله والو طالبانو جګړو ته زور ورکړی او پر ملکي خلکو او افغان ځواکونو بریدونه کوي چې دا حالت نه مونږ ته د منلو دی، بلکې ډیر اندیښمنونکی دی غوښتنه مو دا ده چې د جګړې درېدو لپاره دې د سولې خبرې چټکې شي.»
په همدې حال کې ختیځ کې د سولې په چارو کې د دولت وزرت د دفتر ټاکل شوي رییس فیضان الحق قاضي زاده وویل، هڅه به وکړي چې له دې لارې د قومي مشرانو او د ټولنې د نورو وګړو نظریات راټول او د سولې مذاکراتي پلاوي به یې ور ورسوي.
قاضي زاده زیاته کړه: «ختیځ کې چې کوم د سولې په چارو کې د دولت وزارت له لوري دفتر پرانیستل شو، مونږ به هڅه وکړو چې له همدې لارې د خلکو نظریات راټول او د سولې مذاکراتي ټیم ته یې ور ورسوو او په دې برخه کې به له ولسي خلکو، قومي مشرانو او نورو خلکو نظریات اخیستل کیږي.»
د ولسي خلکو په استازولۍ شریف الله ناصري بیا غونډې ته په خبرو کې د سولې په برخه کې د افغان حکومت له لوري قطر ته په استول شوي پلاوي نیوکې وکړې او ویې ویل، یاد پلاوي څه ډول چې لازمه ده د ولس خلک یې تر نړیوالو نه دی رسولی.
شریف الله ناصري زیاتوي: «کوم پلاوی چې قطر ته تللی هغوی ډیره تجربه نه لري او نه دیني پوهه لري که وي هم ډیر به کمه وي، زمونږ غږ یې هم نه دی رسولی په سم ډول تمه مو دا ده چې په یاد پلاوي کې د ولس له منځه دیني عالمان او مخور هلته ولیږل شوي ترڅو د ولس په سم ډول استازولي وکولای شي.»
د غونډې یو شمیر نورو وینا والو بیا له وسله والو طالبانو وغوښتل، چې د جګړو پر مهال دې د ملکي وګړو د خوندیتوب سربیره عامه تاسیساتو ته زیان نه رسوي.
