اطلاعات روز: د افغانستان ارشاد، حج او اوقافو وزارت وایي، د سعودي عربستان په کوربه توب او د «رابطه عالم اسلامي» تر مشرۍ لاندې د افغانستان، پاکستان او ځینو نورو هېوادونو عالمان د افغان جګړې پر مشروعیت بحث لپاره کنفرانس جوړوي.
د حج او اوقافو وزارت ویاند فضل محمد حسیني اطلاعات روز ورځپاڼې ته وویل، چې دغه کنفرانس به سبا (پنجشنبه، د غبرګولي په ۲۰مه) سعودي عربستان کې جوړ او د افغان جګړې پر مشروعیت به بحث وشي.
ښاغلی حسینی وایي، په دې کنفرانس کې به د پاکستان د دیني چارو وزیر، د پاکستان د عالمانو مشر او د پاکستان نور نامتو او ستر دیني عالمان ګډون وکړي. دغه راز به د افغانستان حج او اقافو وزیر، سعودي کې د افغانستان او پاکستان سفیران او د رابطه عالم اسلامی مشر به په کې ګډون کوي.
د یاد وزارت ویاند وویل: «دوی په سوله کې د عالمانو پر رول او همدارنګه د افغانستان سولې له لړۍ د دغو عالمانو ملاتړ، د مسلمان او وروژنې بحث او همدارنګه اسلام کې د سولې پر ارزښت او د سیمې پر امنیت بحث کیږي.»
د حج او اوقافو وزارت ویاند فضل محمد حسیني په دې یو ورځني کنفرانس کې د پاکستان د سترو ګډون کوونکو عالمانو له ډلې یو هم محمد تقي عثماني یاد کړ او زیاته یې کړه چې د ده ترڅنګ به نور پاکستاني نامتو عالمان هم ګډون وکړي.
دا په داسې حال کې ده چې له افغانستانه بهرني ځواکونو په وتو دي او د امریکا متحده ایالتونو اعلان کړی چې د همدې روان زېږدیز کال د سپټمبر تر ۱۱مې به له دې هېواده خپل ټول ځواکونه وباسي.
طالبانو چې تل ویلي، افغانستان کې د بهرنیو ځواکونو شتون له امله جنګیږي، خو اوس چې دغه ځواکونه وځي او ترڅنګ یې د افغانستان دولت او طالبانو ډلې ترمنځ د سولې خبرې هم په وقفه یي ډول روانې دي، څرګنده نه ده چې د دوی تر وتلو وروسته به یاده ډله خپل جنګ غځوي او که نه؟
له دې وړاندې هم په سعودي عربستان، نایجېریا، مالیزیا، کوېټ او ځینو نورو هېوادونو کې د افغانستان د شخړې پر موضوع ورته کنفرانسونه او غونډې جوړې شوې دي.
په دې غونډو کې افغانستان کې روانه جګړه نامشروع او «ورور وژنه» بلل شوې وه او پر طالبانو د جګړې پای ته رسولو غږ شوی و، خو طالبانو ډلې بیا د دې کنفرانسونو دغه پرېکړه رد او ویلي و، چې دوی د «اشغال» پر وړاندې مبارزه کوي.
