اطلاعات روز: د پکتیا ولایت مقام وایي، په دې ولایت کې د ملي امنیت ځواکونو د هدفي وژنو او غلاوو په تور دولس تنه نیولي دي.
له پکتيا ولايت مقام څخه خپره شوې خبرپاڼه کې راغلي، چې نن (دوشنبه، ۱۰ د غبرګولي) د پکتیا ملي امنیت ریاست ځواکونو له لوري د کشفي راپورونو پر بنسټ ۱۲ تنه چې ويل کيږي، په غلاوو، هدفي وژنو او د دولت ضد کړنې يې ترسره کولې، نيولي او په خپلو جرمونو يې اعتراف هم کړی دی.
خبرپاڼه زياتوي، چې له نيول شويو کسانو سره څو ميله وسله هم نيول شوې ده.
ملي امنيت دا کسان په داسې مهال نيسي، چې تېره ورځ په مرکز ګردېز کې د والي مېلمستون ته په شاوخوا سل مترۍ کې نامالومو وسله والو د کابل بانک په کارمنانو ډزې وکړې، چې په دې پېښه کې د بانک دوه کسان ووژل شول او د دوو پوليسو په ګډون څلور نور په کې ټپيان شول.
