اطلاعات روز: د افغانستان بهرنیو چارو وزارت وایي، له دې هېواده د ناټو ځواکونو تر وتلو وروسته د ياد سازمان د ملاتړ د دوام، چې په دې وروستيو کې فرانسې کې د ناټو عمومي منشي له خوا اعلان شوی دی، هرکلی کوي.
د هېواد بهرنیو چارو وزارت نن (شنبه، د غبرګولي ۱) په یوې خپره شوې خبرپاڼه کې ویلي، چې د افغانستان او ناټو ترمنځ د همکارۍ نوي څپرکي پیل په هېواد او سیمه کې تلپاتې سولې او ثبات د ټینګښت او له ترهګرۍ سره په ګډه مبارزه کې د هېواد د امنیتي او دفاعي ځواکونو د ظرفیتونو لوړولو په لور یو اغیزمن ګام بولي.
د یاد وزارت خبرپاڼه لیکلي: «موږ د امنیت سکتور لپاره د ظرفیت لوړونې، مالي ملاتړ، د افغان امنیتي او دفاعي ځواکونو روزنې، د کابل نړیوال هوایی ډګر پیاوړي کولو په شمول د لوژستیکي خدماتو په برخه کې افغانستان سره د ناټو پر ملاتړ بیا ټینګار د دفاعي سکتور اړتیاو سره مناسب ګڼو او ورڅخه قدردانی کوو.»
د افغانستان بهرنیو چارو وزارت دغه راز لیکلي، چې افغان حکومت د يوه خپلواک، متحد، سوله ییز او ولسواک افغانستان د جوړولو په موخه، ناټو سره په افغانستان او سیمه کې د ترهګرۍ او افراطیت له ګډ ګواښ سره په مبارزه کې د همکاريو په نوي څپرکي کې هراړخیزه همکاري وکړي.
