خبریال: جان اغا صالح
د لغمان دولت شاه ولسوالي د وسله والو طالبانو لاس ته لوېدلې ده. د لغمان د ولایتي شورا رییس عتیق الله عبدالرحیمزی اطلاعات روز ورځپاڼې سره په خبرو کې منلې، چې نن سهار (پنجشنبه، ۳۰ د غویي) د لغمان ولایت دولت شاه ولسوالۍ د وسله والو طالبانو له خوا سقوط شوې ده.
ښاغلي عبدالرحیمزي وویل، له دولت شاه ولسوالۍ هر ډول وسلې، تجهیزات او سرتیري تېره شپه د ځایي قومي مشرانو په منځګړیتوب ویستل شوي او نن سهار اووه بجې یادې ولسوالۍ ته وسله وال طالبان دننه شوي دي.
د عبدالرحیمزي په وینا یاده ولسوالۍ له تېرو شپږو میاشتو راهیسې د وسله والو طالبانو تر محاصرې لاندې وه او تر اوسه ورته هېڅ تازه دمي سرتیري او مرسته ځکه نه شوه رسېدلی، چې طالبانو دغې ولسوالۍ ته ورغلې لار له ماینونو ډکه کړې وه او هېڅ دولتي قوې پکې مخکې تګ نه شوای کولی.
عتیق الله عبدالرحیمزي زیاته کړه: «د دولت شاه ولسوالۍ نن سهار اووه بجې وسله والو طالبانو سقوط کړې او افغان ځواکونو د قومي مشرانو په منځګړیتوب شاه تګ کړی او وسله والو طالبانو یاده ولسولۍ نیولې ده، دولت شاه ولسوالۍ ته له تیرو شپږ میاشتو راهیسې اکمالات نه کیدل او ورغلې ټولې لارو کې ماینونه ځای پر ځای شوي وو.»
خو د هېواد ملي دفاع وزارت د دولت شاه ولسوالۍ د سقوط خبره اوازه یاده او رد کړې.
د ملي دفاع وزارت ویاند روح الله احمدزی وایي، په دولت شاه ولسوالۍ کې افغان ځواکونو «لنډمهاله او تاکتیکي» شاتګ کړی او ولسوالۍ نه ده سقوط شوې.
د هغه په خبره، افغان ځواکونه د مقاومت په حال کې دي او ډېر ژر به د وسله والو مخالفینو بریدونه په شا وتمبوي.
روح الله احمدزي زیاته کړه: «د لغمان د ولت شاه ولسوالۍ څخه افغان ځواکونو تاکتیکي شاتګ کړی او سقوط شوې نه ده، اوسمهال تازه دمي ځواکونو رسیدلي خلکو ته ډاډ ورکوو چې مونږ به له خلکو او هیواد دفاع کوو.»
بل لور ته طالب ویاند ذبیح الله مجاهد اطلاعات روز ورځپاڼې ته وویلې، چې دولت شاه ولسوالۍ یې سقوط کړې او له حکومتي ځواکونو یې درې ټانکونه، یو رینجر موټر او ګڼ شمیر نورې وسلې او مهمات ترلاسه کړي دي.
مجاهد زیاته کړه: «زمونږ مجاهدینو د لغمان دولت شاه ولسوالۍ سقوط کړې او له افغان ځواکونو مو درې ټانکونه، یو رینجر موټر او نور وسلې او مهمات ترلاسه کړي دي او ولسوالۍ زمونږ په ولکه کې ده.»
د لغمان ولایت یو نوراغا اطلاعات روز ورځپاڼې سره په خبرو کې اندیښنه وښوده او ویې ویل، له دولت شاه سربېره بادپښ، الیشنګ او یو شمیر نورو ولسوالیو کې هم حکومتي پوستې د کلابندۍ په حال کې دي او که مرسته ورته ونه رسېږي، د دغو ولسوالیو د سقوط اندېښنې هم شته دي.
نوراغا زیاته کړه: «مونږ له حکومت غوښتنه کوو، چې لغمان ته ځانګړې پاملرنه وکړي نن دغه دی دولت شاه ولسوالۍ سقوط وکړ او همداراز الیشنګ، بادپښ او یو شمیر نورې ولسوالۍ هم د سقوط له ګواښ سره مخ دي، هیله ده حکومت دغه ولسوالیو کې خپل حضور زیات کړي تر خلک وکولای شي خپل ژوند وکړي.»
اخوا د لغمان په الینګار ولسوالۍ کې بیا د ولسي خلکو په منځګړیتوب د حکومت او طالبانو ترمنځ د یوې میاشتې لپاره په اوربند توافق شوی دی.
ځايي قومي مشران وایې، دا اوربند ددې لپاره شوی دی چې په سیمه کې خلک خپل د غنمو رسېدلي فصلونه په امنیتي فضا کې راټول کړي.
دا د لغمان په الینګار او الیشنګ ولسوالیو کې له ګڼو حکومتي پوستو له سقوط وروسته لومړۍ ولسوالۍ ده، چې وسله والو طالبانو لاس ته لویدلې ده.
تر دې مخکې د روژې میاشتې په اوږدو کې له لسو ډېرې پوستې په الینګار ولسوالۍ کې له مقاومت پرته طالبانو نیولي وې او دغه راز، تازه وړمه شپه الیشنګ کې هم څلور پوستې سقوط شوې دي.
ملي دفاع وزارت وایي، اوسمهال د هېواد په ۱۱ ولایتونو کې له طالبانو سره په جګړو بوخت دي. په دې جګړو کې حکومت او طالبان یو بل ته د سختو مرګ – ژوبلو د اوښتو خبر ورکوي.
د هېواد په بېلابېلو سیمو کې د جګړو لمن په داسې حال کې پراخه او زوروره شوې، چې د افغان حکومت او طالبانو ډلې د سولې خبرې اترې په یو بې برخلیکه حالت کې دي.
