اطلاعات روز: د ۲۱۵ میوند قول اردو وایي، هلمند ولایت کې د دفاعي ځواکونو عملیاتو کې د هند جزیرې لپاره د القاعده شبکې ۲۲ غړي وژل شوي دي.
یاد قول اردو نن (سه شنبه، ۱۴ د غویي) په خپره شوې خبرپاڼه کې ویلي، د القاعده شبکې دغه غړي په تیرو ۲۴ ساعتونو کې د هلمند ولايت په مختلفو سيمو کې د افغان دفاعي ځواکونو د تروریزم ضد عملیاتو په پايله کې وژل شوي دي.
د دې قول اردو په خبرپاڼه کې راغلي: «د وروستيو استخباراتي معلوماتو له مخې، د هند جزيرې لپاره د القاعده شبکې ۲۲ غړي، چې د پاکستان د پنجاب ایالت اصلي اوسیدونکي وو، په وژل شویو ترهګرو کې شامل دي.»
دغه قول اردو دغه راز ویلي، چې افغان هوايي ځواکونو د هلمند ولايت ناوې ولسوالۍ په مومن خان سيمه کې د طالبانو یو قوماندان په ګډون ۸ تنه وژلي دي.
یادې خبرپاڼې لیکلي: «د احمد په نوم د يادې ډلې د يوه قومندان په ګډون، ۸ ترهګر طالبان وژل شوي او ۴ تنه نور يې ټپي دي.»
د دوی په وینا، په دغو هوايي عملياتو کې د «دښمن» يو شمېر وسلې او مهمات هم له منځه وړل شوي.
دغه راز دوی ادعا کوي چې د هوايي ځواکونو د هوايي عملياتو په ترڅ کې، د هلمند ولايت مرکز لښکرګاه اړوند بشران سيمه کې یې هم ۴ طالبان وژلي او یو تن یې ټپي کړی دی.
دوی دغه راز وایي، چې په دغو عملیاتو کې یېهمدارنګه يو شمېر وسلې او مهمات هم له منځه وړي دي.
طالبانو او القاعده شبکې لاتراوسه په دې اړه څه نه دي ویلي.
