اطلاعات روز: د ننګرهار په لعلپورې ولسوالۍ کې په یو وسله وال برید کې د یوې کورنۍ پنځه غړي وژل شوي او درې نور ټپيان شوي دي.
د ننګرهار والي ضیاءالحق امرخېل نن (سې شنبه، ۷ د غویي) د پېښې د تایید ترڅنګ اطلاعات روز ورځپاڼې ته وویل، تېره شپه شاوخوا ۱۲ بجې د ننګرهار لعلپورې ولسوالۍ په «صدې» سيمه کې وسله والو د یوه کور مخې ته په دېره کې ناستو کسانو باندې ډزې کړي.
د ښاغلي امرخېل په وینا په دې ډزو کې ۵ تنه وژل شوي او ۳ ټپيان دي او ټول د یوې کورنۍ غړي دي.
امرخېل زیاتوي پېښه د تفسیر په نوم د وسله والو طالبانو د یوه پخواني غړي په دېره کې شوې چې په وژل شویو کې نوموړی او یو ورور یې شامل دي.
والي وایي چې د دوی کشفي او امنیتي ارګانونه د دې پېښې د لامل د څرنګوالي او عاملينو د نيولو په موخه اقدامات پيل کړي دي.
امرخیل زیاته کړه: «تیره شپه شاوخوا دولس بجې لعلپورې ولسوالۍ کې وسله والو کسانو په یو برید کې د یوې کورنۍ بنځه غړي وژل شوي او درې نور ټپیان شوي دي.»
دا پېښه په داسې حال کې ده چې نېږدې دوه اونۍ وړاندې هم نامعلومو وسله والو د جلال اباد ښار د نهمې ناحیې اړوند سراچه علي خان سیمه کې په جومات کې پر لمونځ کوونکو ډې کړې وې او د یوې کورنۍ ۸ غړي یې وژلي وو او دوه نور ټپیان وو.
له دې پېښې یوه اونۍ وروسته د لغمان په مرکز مهترلام کې هم پر لمونځ کوونکو برید شوی و، یې د یوه قومي مشر په ګډون دوه تنه وژل شوي وو او دوه ټپیان وو.
تراوسه د دې پېښو مسوولیت چا نه دی منلی.
