اطلاعات روز: هلمند کې ځایي سرچینې وایي، چې د دې ولایت په موسی کلا ولسوالۍ کې د جومات لپاره د ملا امام ټاکلو پر سر شخړه کې یو کس وژل شوی او درې تنه نور ټپیان شوي دي.
یوې سرچینې وویل، چې پیښه نن (چهارشنبه، ۲۶ د لیندۍ) سهار تر لمانځه وروسته د موسی کلا ولسوالۍ اړوند «شهرګي» کلي کې رامنځته شوې.
سرچینه زیاتوي، چې د یاد کلي اوسیدونکو د خپل جومات لپاره د ملا امام ټاکلو پر سر شخړه کړې او پر مهال یې د محمد عیسی په نوم یو ۲۶ کلن ځوان وژل شوی او درې تنه نور ټپیان دي.
ځایي طالبانو تر اوسه په دې اړه څه نه دي ویلي، او نه هم د ټپیانو د روغتیایي وضعیت په اړه څه ویل شوي دي.
د هیواد په سویل کې وخت ناوخت د ځمکو، اوبو، ماشومانو او نورو ستونزو له امله شخړې رامنځته کېږي، چې تل له ځان سره مرګ ژوبله لري.
