اطلاعات روز: د افغانستان په چارو کې د پاکستان پخواني استازي اصف دراني ویلي، چې هند «افغانستان سره د مینې له کبله» طالبان نه راجذبوي، بلکې غواړي د افغانستان خاوره د پاکستان پر وړاندې وکاروي.
هغه ایکس کې پر خپله پاڼه لیکلي: «دا نوې راټوکېدلې سناریو د طالبانو د رژیم د بقا لپاره خطرناکه ده. هیله ده طالبان له دې ځانمرګي لوري څخه ډډه وکړي.»
پاکستاني چارواکي ادعا کوي، چې هند د افغان طالبانو له لارې د پاکستاني حکومت پر وړاندې د پاکستاني طالبانو یا ټي ټي پي ملاتړ کوي. خو، هند او طالبان دا ادعا ردوي.
طالبان په داسې حال کې چې د پاکستان سره ترینګلې اړیکې لري، هند ته نږدې شوي دي. د طالبانو د بهرنیو چارو وزیر امیر خان متقي نوي ډیلي ته د سفر وروسته، هند اعلان وکړ چې په افغانستان کې خپل ماموریت د سفارت کچې ته لوړوي.
په داسې حال کې چې متقي په هند کې و، پاکستان د پلازمینې کابل په ګډون د افغانستان په څو ولایتونو هوایي بریدونه وکړل. د دې برید له امله د طالبانو او پاکستاني ځواکونو ترمنځ یوه اونۍ نښتې وشوې، چې وروسته دواړو خواوو اوربند او خبرې اترې وکړې، خو خبرو کومه پایله ورنه کړه او حالت لا هم کړکیچن دي.
