اطلاعات روز: د ملګرو ملتونو د ماشومانو د ملاتړ صندوق (یونیسف) ویلي، چې پر افغانستان د اقلیمي بدلون اغیز یو پټ بیړنی حالت دی. دې بنسټ یادونه کړې چې په وچکالۍ ځپلو ولایتونو کې د اوبو له نیمایي څخه ډیرې سرچینې وچې شوي او له هرو لسو کسانو څخه اته یې ککړې اوبه کاروي.
د یونیسف استازی تاجالدین اویوال د ملګرو ملتونو د اقلیم بدلون د (کوپ–۳۰) ناستې په پیل په یوه راپور کې ویلي، چې افغانستان له هغو هېوادونو څخه دی چې د اقلیمي بدلون له اغېزو څخه تر ټولو ډېر زیان ویني، په داسې حال کې چې نږدې هېڅ برخه په دې بحران کې نه لري.
د هغه په وینا، د اقلیمي او اوبو بحرانونو اغیز په افغان کورنیو باندې لږ لیدل کېږي.
تاج الدین اویوال زیاته کړې: «په هیواد باندې د اقلیمي بدلون اغیز په ریښتیا سره یو پټ بیړنی حالت دی؛ په کلیدي وچکالۍ ځپلو ولایتونو کې د اوبو له نیمایي څخه ډیرې سرچینې وچې شوې دي.»
د هغه په وینا، له هر لسو کسانو څخه اته تنه ککړې اوبه څښي، او په ښاري سیمو کې د روغتیايي خدمتونو سیستمونه د طبیعي افتونو او چاپېریالي ویجاړتیا له امله د ړنګېدو په حال کې دي، چې دا د اوبو له لارې د خپرېدونکو ناروغیو د زیاتېدو لامل کېږي.
خو، د یونیسف د استازي په خبره، افغانستان لا هم د نړۍ له هغو هېوادونو څخه دی چې د بشردوستانه بحرانونو په برخه کې تر ټولو لږه بودیجه لري، او یوازې د اړتیا وړ بودیجې پنځه سلنه یې د خوندي او د اقلیم د بدلون پر وړاندې د مقاومو اوبو او فاضلهاوبو د سیستمونو د برابرولو لپاره ترلاسه کړې ده.
یونیسف ویلي، چې د بودیجې محدودیتونو سره سره، دا او د هغې شریکان شپه او ورځ کار کوي ترڅو هغو کورنیو او ماشومانو ته مرستې چمتو کړي چې له ډیری بیړنیو حالتونو سره مخ دي.
د دې بنسټ استازي په برازیل کې د نړۍ له مشرانو غوښتي چې د خبرو په تالارونو کې غیرحاضر هېوادونه او هغه ماشومان په یاد ولري چې له تشو لوښو سره د اوبو په لټه کې ګرځي.
د ملګرو ملتونو د اقلیمي بدلون کنفرانس د دوشنبې په ورځ په رسمي ډول د برازیل په بیلم کې پیل شو.
په دې کنفرانس کې افغانستان کوم استازی نه لري. طالبانو اعلان کړی چې دوی ته بلنه نه ده ورکړل شوې.
