د پاکستان د بهرنیو چارو وزارت ویاند طاهر اندرابي وايي چې د ترکیې په استانبول کې له طالبانو سره د درېیم پړاو مذاکراتو پر مهال پاکستاني پلاوي د هیوادونو تر پولو د خپرېدونکي تروریزم د مخنیوي په موخه پر شواهدو ولاړې او منطقي غوښتنې منځګړو ته وړاندې کړې دي.
د جیو نیوز د راپور له مخې، نوموړي نن (جمعه، د لړم ۱۶مه) په یوه خبري ناسته کې وویل چې منځګړو د دې هیواد د پلاوي له لوري د وړاندې شویو شواهدو له مخې سم بللی او «له نړیوالو اصولو او قوانینو سره سم» یې بشپړ تایید کړی دی.
هغه زیاته کړې چې منځګړي د پاکستان غوښتنې له طالب پلاوي سره پړاو په پړاو ارزوي.
د پاکستان د بهرنیو چارو وزارت ویاند وویل: «هر ډول نور اټکلونه چې په ټولنیزو رسنیو، په ځانګړي ډول د افغان کاروونکو له خوا خپرېږي، یا صرف اټکلونه دي یا د غلطو معلوماتو قصدي خپرونه ده.»
د طالبانو او پاکستان تر منځ د خبرو درېیم پړاو د قطر او ترکیې په منځګړیتوب پرون په استانبول کې پیل شو.
ویل کېږي، د دواړو لورو تر منځ یو له مهمو اختلافونو څخه په افغانستان کې د تحریک طالبان پاکستان (TTP) د غړو حضور او له افغانستانه د هغوی د استفادې ادعا ده.
پاکستان ادعا کوي چې د تحریک طالبان پاکستان مشران او غړي په افغانستان کې شته او له دې خاورې څخه د پاکستان پر ضد بریدونه طرحه او ترسره کوي.
د پاکستاني چارواکو د څرګندونو له مخې، د دې هېواد پلاوي له طالبانو سره په خبرو کې له هغوی د دې ضمانت غوښتنه کړې چې د افغانستان خاوره به د پاکستان پر ضد نه کارېږي.
خو طالبان وايي چې دوی د تحریک طالبان پاکستان استازیتوب نشي کولای او دا د پاکستان داخلي موضوع ده.
طالبانو او پاکستان د یوې اونۍ تر خونړیو نښتو ووسته د قطر او ترکیې په منځګړیتوب خبرې پیل کړې.
په دوحه کې د خبرو په لومړي پړاو کې دواړو لورو د سمدستي اوربند او د خبرو د دوام پرېکړه وکړه، خو دوهم پړاو چې په استانبول کې ترسره شو او نږدې یوه اوونۍ یې دوام وکړ، بې له کوم پرمختګه پای ته ورسېد.
