اطلاعات روز: د افغانستان عامې روغتیا وزارت دوه ورځې وړاندې په کور دننه د ولسمشر محمداشرف غني د عملیاتو ته په نغوته وایي، چې افغانان باید پر خپلو ډاکټرانو باور ولري.
د عامې روغتیا چارسمبالي ډاکټر وحید مجروح دغه څرګندونې نن (پنجشنبه، ۱۹ د وري) کابل کې د روغتیا نړیوالې ورځې نمانځنې په مراسمو کې وکړې او زیاته یې کړه، د ولسمشر بریالي عملیات د افغان ډاکټرانو وړتیا ښیي.
د روغتیا وزارت پر فیسبوکپاڼې یوې خپرې شوې اعلامیه کې راغلي: «د عامې روغتیا سرپرست وزیر په افغان ډاکټرانو د ولسمشر اعتماد وستایه، چې دوه ورځې وړاندې یې د کابل په یوه روغتون کې د پروسټاټ بریالی عملیات ترسره شو او وې ویل، د هېواد د ولسمشر بریالي عملیات ترسره کول د افغان ډاکټرانو وړتیا ښیي او خلک باید پر خپلو ډاکترانو باور وکړي.»
ښاغلي مجروح دغه راز ویلي، چې د هېواد روغتیا سکتور په خورا سختو ورځو او شرایطو، په ځانګړي توګه د کرونا کړکېچ په اوج کې خلکو ته ثابته کړه، چې دوی کولی شي معیاري روغتیايي خدمتونه وړاندې او د خپلو خلکو درملنه وکړي.
اعلامیه وایي، ډاکټر مجروح افغان ډاکټران د افغانستان د روغتیا سکتور شتمني وبلله او په ټولو دولتي ادارو، مدني ټولنو، رسنیو او د هېواد له اوسېدونکو یې وغوښتل چې پر خپلو ډاکټرانو باور وکړي.
اعلامیه وایي: «هغه همدارنګه ټینګار وکړ چې د عامې روغتیا وزارت د روغتیایي خدمتونو وړاندې کولو ته وده ورکولو لپاره لوی پروګرامونه تر لاس لاندې لري، چې دغه پروګرامونه د جمهوري ریاست د عالي مقام په ملاتړ پلان شوي دي.»
له بلې خوا، د عامې روغتیا وزارت د پلان او پالیسۍ مرستیال ډاکټر بشیر نورمل روغتیایي خدمتونو ته د خلکو لاسرسي د زیاتولو لپاره د وزارت پر هڅو ټینګار وکړ او څرګنده یې کړه چې د عامې روغتیا ټولیز پوښښ د وزارت لومړیتوب دی.
د اعلامیې له مخې ډاکټر نورمل ویلي: «له نېکه مرغه، د افغان ډاکټرانو وړتیا لوړه شوې او د افغانستان طبي سیستم مخ پر ودې روان دی.»
په ورته وخت کې د هېواد د طبي شورا مشرې ډاکټر نسرین اوریاخیل، په دې ناسته کې ویلي، چې پر افغان روغتیاپالانو د خلکو باور کولی شي چې په بهر کې د زیاتو پیسو د لګښت مخه ونیسي. دې ویلي چې ټول چارواکي او مسوول ارګانونه باید په دې برخه کې له عامې روغتیا وزارت سره همکاري وکړي.
د روغتیا وزارت اعلامیه دغه راز وایي، چې په په دې غونډ کې افغانستان کې د روغتیا نړیوال سازمان استازي ډاکټر ډیویډ لای په ټولیز روغتیایي پوښښ باندې ټینګار وکړ او ویې ویل چې د روغتیا نړیوال سازمان په دې برخه کې د عامې روغتیا وزارت سره همکار دی.
