اطلاعات روز: د بشري حقونو سازمان رواداري وايي، چې د ۲۰۲۵ کال د لومړیو شپږو میاشتو پر مهال افغانستان کې هدفي، پټې او غیر قضایي وژنې شاوخوا ۳۰ سلنه زیاتې شوې دي.
دې سازمان نن (شنبه، ۸ د وږي) په یوه راپور کې ویلي، چې په دې موده کې لږ تر لږه ۲۵۱ تنه په هدفي، مرموز او صحرایي ډول د طالبانو او ناڅرګندو کسانو لهخوا وژل شوي دي.
رواداري ويلي، دا شمېر د ۲۰۲۴ زېږديز کال د همدې مودې له ۱۹۳ پېښو سره په پرتله شاوخوا ۳۰ سلنه زیاتوالی په ګوته کوي.
دې بنسټ زیاته کړې، چې په وژل شویو کې ۲۱۹ نارینه، ۲۰ ښځې او ۱۲ ماشومان شامل دي، چې ډېری یې د پخواني حکومت کارکوونکي، د طالبانو د مخالفو ډلو په غړیتوب یا همکاریو په تور تورن، معترضان، قومي مشران او سیمهییز بانفوذه خلک دي.
د رواداري د راپور له مخې، دغه کسان په ډزو، په سړو وسلو، سرونو پرې کولو او اور اچولو سره وژل شوي دي.
دې بنسټ زیاته کړې، چې د دوی یو شمیر یې د وژلو دمخه تښتول شوي، توقیف شوي، ګواښل شوي یا ترې پوښتنې ګروېږنې شوي او ځینې یې د توقیف څخه تر خوشې کیدو وروسته په شکمن ډول وژل شوي دي.
رواداري په خپل راپور کې دا هم ویلي، چې د روان کال په لومړیو شپږو میاشتو کې د پخواني حکومت لږ تر لږه ۲۰ کارمندان په هدفي، مرموز او غیر قضايي ډول وژل شوي یا ټپیان شوي دي.
د دې بنسټ په وینا، چې دا شمیره د ۲۰۲۴ کال د ورته مودې په پرتله شاوخوا ۶۰ سلنه کمښت څرګندوي، مګر دا په وضعیت کې ښه والی نه په ګوته کوي؛ بلکې د دې پیښو معلوماتو او اسنادو ته د لاسرسي په اړه سخت محدودیتونه په ډاګه کوي.
د رواداري د راپور له مخې، طالبان د قربانیانو کورنیو او نورو سیمه ییزو سرچینو ته د ګواښونو او فشار راوړلو له لارې د هدفي، مرموزو او غیر قضايي وژنو په اړه د معلوماتو د چمتو کولو څخه مخنیوی کوي.
د رواداري څرګندوي، چې طالبانو د دې وژنو د عاملینو د محاکمې او سزا په اړه شفاف اقدام نه دی کړی.
دغه بنسټ زیاته کړې، چې طالبانو د ۲۰۲۵ کال په لومړنیو شپږو میاشتو کې د ۲۵۱ هدفي، مرموزو او صحرایي وژنو په تړاو یوازې دوه کسان په کندهار او هلمند کې نیولي او د پاتې پېښو په اړه یې هېڅ اقدام نه دی کړی.
