اطلاعات روز: نورستان کې د طالبانو د کانونو او پټرولیم ریاست مسوولین خبر ورکوي، چې په دغه ولایت کې یې د ۵۴ مېلیونه او ۵۵۵ زره افغانیو په ارزښت ۱۲۴ کېلو ګرامه بیروج ډبرې وپلورل شوې.
د یاد ولایت لپاره د طالبانو د کانونو او پټرولیم رييس سیدرحیم عمیر وايي، دا ډبرې پرون (جمعه، ۷ د وږي) په کامدېش ولسوالۍ کې د ازادې داوطلبۍ له لارې پلورل شوي دي.
سید رحیم عمیر زیاتوي، چې د دغو ډبرو د پیسو له درکه پنځه مېلیونه او ۴۵۰ زره افغانۍ عواید د طالبانو حکومت خزانې ته هم جمع شوې دي.
د یادونې ده چې تېره ورځ هم طالبانو د نورستان په برګمټال ولسوالۍ کې د ۱۴۲ مېلیونه او ۷۰۰ زره افغانیو په ارزښت بیروج ډبرې د ازادې داوطلبۍ له لارې پلورلې دي.
واک ته د طالبانو له رسېدو وروسته دې ډلې د افغانستان په ګوټ ګوټ کې د ګران بیه او نیمه ګران بیه ډبرو د کانونو د استخراج او دغو ډبرو د پلور لړۍ چټکه کړې او باورونه دا دي چې حاکم رژیم په لوی لاس د هېواد د طبیعي زېرمو د له منځه وړلو هڅې پیل کړي.
