اطلاعات روز: د روسیې د ملي امنیت د شورا عمومي منشي سرګئي شویګو ویلي چې د دې هیواد ارزونه ښیي چې په افغانستان کې ۲۰ ترهګرې ډلې موجودې دې او ۲۳ زره غړي لري.
ده په هغه مقاله کې چې نن (جمعه، ۷ د وږي) یې په دولتي ورځپاڼه «روسیسکایا ګازتا» کې خپره کړې ویلي چې دا ډلې د سیمې او نړۍ لپاره جدي ګواښ دی.
د روسیې د ملي امنیت د شورا عمومي منشي ویلي چې تر ټولو لویه اندېښنه د داعش خراسان ډله ده چې تر ډېره د افغانستان په ختیځ، شمال او شمال ختیځ کې زده کړییز او عملیاتي مرکزونه لري.
سرګئي شویګو په عین مهال کې ادعا کړې چې طالبان له دې ترهګرو ډلو سره مبارزه کوي او که پر طالبانو د لوېدیځ بندیزونه نه وای، دا مبارزه به لا هم اغېزمنه وای.
تر دې وړاندې ملګرو ملتونو هم په افغانستان کې د داعش خراسان ډلې په شمول د ترهګرو ډلو د شتون په اړه اندیښنه ښوولې وه.
له ترهګرۍ سره د مبارزې په برخه کې د ملګرو ملتونو د عمومي منشي مرستیال ولادیمیر ورونکوف د دې سازمان په غونډه کې ویلي چې په افغانستان کې د داعش خراسان ډلې حضور لا هم د افغانستان او تر دې هاخوا سیمې لپاره یو جدي ګواښ دی.
مګر طالبان په افغانستان کې د داعش او نورو ترهګرو ډلو شتون ردوي.
دا ډله ادعا کوي چې په افغانستان کې داعش خراسان ډله تر ځپل کېدو وروسته خپل عملیاتي مرکزونه او پناهځایونه پاکستان ته انتقال کړي دي.
