اطلاعات روز: د کورنیو چارو وزارت وایي، تورخم ښارګوټي کې هغه پولیس سرتېری چې مېرمنې یې په لښته وهلې وې، له مجازاتو سربېره تل لپاره له نظامه بهر شو.
د دې وزارت ویاند طارق ارین نن (یکشنبه، ۸ د وري) پر خپل ټوېټر لیکلي، چې دغه سرتېری وهاب نومیږي او زیاته کړې ده، چې د نوموړي دا کړنه طالباني دود او ترسره کوونکی یې «ترهګر» دی.
نوموړي زیاته کړې: « پر ښځو لاس پورته کول طالباني دود دی او هر هغه کس چې دا ډول ظلم ترسره کړي، ترورېست دی. په تورخم کې هغه ویډیو چې پر یوې ښځې د لاس پورته کولو او ډبولو وه، وڅېړل شوه. هغه سرتېری وهاب نومېږي او د مجازاتو سربېره د تل له پاره له نظام څخه وایستل شو.»
طارق ارین په دوام کې لیکلي چې پولیس د قانون پلې کوونکي کې دي او د مسلکي کېدو لپاره یې کار کیږي او زیاته کړې یې ده چې پولیس متخصص او ولسي ځواک دی، پر ځوروونکو اعمالو لاس پورې کول یې په هېڅ ډول د منلو نه ده.
څو ورځې وړاندې پر ټولنیز شبکو یوه ویډیو خپره شوه او په کې لیدل کېدل چې یو پولیس سرتېری په لښته مېرمنې وهي. دغې ویډیو ټولنیزو شبکو کې د افغان کاروونکو توند غبرګونونه راپارولي و او له حکومت یې په دې برخه کې د جدي اقدماتو غوښتنه کړې وه.
هغه مهال د ننګرهار د والي ویاند عطاالله خوږیاڼي اطلاعات روز ورځپاڼې سره په خبرو کې د خپرې شوې ویډیو په اړه ویلي و، چې په دې اړه یې څیړنې پیل کړي او له څیړنو وروسته به یې عاملینو ته قانوني سزا ورکړي.
تورخم سوداګریزه لاره د پاکستان او افغانستان ترمنځ تر ټولو لویه سوداګریزه لار ګڼل کیږي، خو پر دغه لاره تلونکي په تورخم ښارګوټي کې د پولیسو له بد چلند شکایت کوي.
