اطلاعات روز: د افغانستان د خبریالانو مرکز اعلان کړی چې په کندهار کې د طالبانو د اطلاعاتو او کلتور ریاست د ښځو د غږ خپرول په مطلق ډول بند کړي او محلي راډیوګانې یې مکلفې کړې دي چې تر دې وروسته به هبت الله د «عالیقدر امیرالمؤمنین حفظه الله» په نوم سره یادوي.
د خبریالانو د مرکز په وینا، دا بندیزونه پرون (دوشنبه، ۲۷ د کب) اعلان شوي.
په کندهار کې د طالبانو د اطلاعاتو او کلتور ریاست په اعلامیه کې ویل شوي چې راډیوګانې باید تر دې وروسته په خپلو راپورونو او خپرونو کې د طالبانو مشر په «عالیقدر امیرالمؤمنین حفظه الله» او د دې ډلې حکومت په «اسلامي امارت» نومونو سره یاد کړي.
همدا راز په راډیوګانو کې د ښځو پر غږ مطلق بندیز لګېدلی او په تفریحي خپرونو کې د ښځو د پیغامونو خپرول هم منع شوي دي.
همدا راز د عامې روغتیا د ریاست له رسمي جواز پرته د درملو، سینګار کریمونو او پوډرونو او د کلینیکونو او روغتونونو اعلان خپرول هم منع شوي دي.
په کندهار کې د طالبانو اطلاعاتو او کلتور ریاست ویلي چې د راډیو کارمندان چې د راپورونو او خپرونو د ثبت لپاره کندهار ښار او ولسوالیو ته ځي، باید جواز ولري.
د افغانستان د خبریالانو مرکز ویلي چې په کندهار کې د طالبانو د اطلاعاتو او کلتور ریاست اعلامیه تازه ده او تر اوسه له رسنیو څخه دا غوښتنه نه وه شوې چې هبت الله ته «امیرالمؤمنین» ووایي.
همدا راز د خبریالانو د مرکز په وینا، په کندهار کې د ښځو پر غږ مطلق بندیز هم تازه دی.
د خبریالانو مرکز ویلي چې اوسمهال په کندهار کې محلي ټلویزوني شبکه نشته، خو ۱۲ راډیوګانې فعالیت کوي.
د افغانستان د خبریالانو مرکز د کندهار پر رسنیو تازه محدودیتونه غندلي او دا یې د ازادو رسنیو د ځپنې د سیاست لا تشدید ګڼلی دی.
دې مرکز ویلي چې د محدودیتونو او سانسور بې مخینې تشدید د هغو محلي رسنیو بقا له جدي خطر سره مخ کړې دې چې له سختو مالي ستونزو سره مخ دي.
د افغانستان د خبریالانو مرکز له طالبانو غوښتي چې د خلګو پر روح او روان د بیان د ازادۍ او رسنیو د ځپنې پایلې جدي وګڼي او د بیان ازادۍ ته د یوه بنسټیز بشري حق په توګه درناوی وکړي.
