اطلاعات روز: د «یوه ولسواک افغانستان لپاره د ویانا بهیر» د پنځمې غونډې ګډونوالو په خپله وروستۍ العامیه کې له نړیوالې ټولنې غوښتي چې دوی دې ورسره «د یوه انتقالي حکومت په جوړولو کې مرسته وکړي».
دوی په هغه اعلامیه کې چې نن (چهارشنبه، ۱ د کب) یې خپره کړې، همدا راز ویلي چې نړیواله ټولنه باید د افغانستان لپاره د یوه نوي مسیر د را منځ ته په کولو موخه یوه باهدفه او عملي تګلاره خپله کړي.
د دې غونډې ګډونوالو ویلي چې د افغانستان خلګ او نړۍ باید په هیواد کې د دې وضعیت په تړاو پر خپلو تګلارو فکر وکړي او د اوسني کړکېچ د حل لپاره په ډلییزه توګه اقدام وکړي.
د ویانا بهیر پنځمه غونډه پرون د «افغانستان د ملي مقاومت جبهې» د مشر احمد مسعود او د «افغانستان د ازادۍ جبهې» د مشر یاسین ضیا په شمول د طالبانو د یو شمېر مخالفینو په شتون کې پیل شوه.
د دې غونډې په وروستۍ اعلامیه کې ویل شوي چې دوی په دې غونډه کې د افغانستان د شته ننګونو د ارزونې او د خلګو د غوښتنو د رسونې په موخه راغونډ شوي وو او د «ویانا بهیر د لار نقشې» پر بشپړولو یې کار وکړ.
په دې اعلامیه کې ویل شوي چې د «ویانا بهیر لار نقشه» د افغانستان راتلونکی ترسیموي او د سیاسي لرلید، نړیوالو اړیکو، بشري حقونو او د افغانستان د اقتصادي چارچوپ په شمول موارد پکې ځای پر ځای شوي دي.
د دې اعلامیې له مخې، د ویانا بهیر په پنځمه غونډه کې پرېکړه شوې او یو ۱۹ کسیز کمیسیون یې د لار نقشې د وروستۍ مسودې د تصویب، له کړکېچ څخه د وتلو د طرحې جوړولو او د سیاسي جامعو جوړښتونو د رامنځ ته کولو په موخه جوړ کړی دی.
د دې غونډې ګډونوالو د افغانستان له ولسي بنسټونو، له ګاونډیو او سیمهییزو هیوادونو، نړیوالو بنسټونو او «ولسواکو ملاتړو دولتونو» څخه غوښي چې د ویانا بهیر په لار نقشه کې مطرح شوي اصول دې د افغانستان له خلګو سره د مرستې لپاره د راتلونکو اقداماتو د یوه بنسټ په توګه ومني او اړینه مرسته دې وکړي.
د «ویانا بهیر» غونډې د اتریش د نړیوالو چارو د مطالعاتو موسسې په کوربتوب جوړېږي.
تر دې وړاندې په تېرو څلورو غونډو کې د طالبانو د مخالفو ځواکونو او ډلو پر انسجام او اتحاد ټینګار شوی و.
