اطلاعات روز: د ایران د عدلیې وزارت د نړیوالو چارو او بشري حقونو مرستیال عسکر جلالیان خبر ورکړی، چې په راتلونکو دوو میاشتو کې به زر تنه افغان بندیان افغانستان ته انتقال شي.
نوموړي نن (چهارشنبه، ۲۳ د لړم) له ایرنا خبري اژانس سره په مرکه کې ویلي، چې د بندیانو د تبادلې په اړه د خبرو لپاره افغانستان ته راځي.
عسکر جلاليان زياته کړې: «په راتلونکو دوو مياشتو کې پلان لرو، چې زر تنه افغان بنديان بېرته خپل هېواد ته واستوو، څو خپل هېواد کې خپلې سزاګانې پوره کړي.»
د هغه په وينا، ډېرى دغه بنديان د نشه يي توکو په جرم په بند محکوم شوي او يو شمېر يې داسې جرمونه کړي، چې د جرم شخصي اړخ يې لېرې شوی او اوس په عمومي توګه د خپل بند موده پوره کوي.
دغه ایراني چارواکي زیاته کړې، چې که بندیان رضایت ونه لري، خپل هېواد ته نه ستنول کېږي.
د ایران د عدلیې وزیر ټینګار کړی، چې د موافقې له مخې به یوازې هغه بندیان چې سزا یې حبس دی، انتقالیږی او د بند پاتې سزا باید د خپل هېواد په زندانونو کې تېره کړي.
د ایراني چارواکو په وینا، په ایران کې نږدې ۹۵ سلنه بهرني بندیان افغانان دي. ویل کیږي چې اته زره بهرني بندیان د ایران په زندانونو کې دي.
ایران او افغانستان په ۱۳۸۵ کال کې د بندیانو د تبادلې تړون لاسلیک کړی.
د دې هوکړې له مخې افغان بندیان څو ځله افغانستان ته لېږدول شوي چې د بند پاتې موده خپل هیواد کې تېره کړي او دې بهیر د طالبانو له راتګ وروسته هم دوام موندلی دی.
