اطلاعات روز: په جینوا کې د افغانستان استازی نصیر احمد اندیشه وايي، چې په افغانستان کې د بشري حقونو وضعیت د ملګرو ملتونو د بشري حقونو د شورا د اووه پنځوسمې غونډې مهمه او کلیدي موضوع ده.
ټاکل شوې چې د ملګرو ملتونو د بشري حقونو د شورا اووه پنځوسمه غونډه نن (دوشنبه، ۱۹ د وږي) د سویس په جینوا ښار کې جوړه شي.
د ښاغلي اندیشه په وینا، د ملګرو ملتونو د بشري حقونو عالي کمیسار ولکر ترک به نن د جینوا پر وخت تر غرمې وروسته په افغانستان کې د بشري حقونو د وضعیت په اړه خپل راپور وړاندې کړي.
ښاغلی اندیشه وايي، چې په دې راپور کې په افغانستان کې د بشري حقونو د نقض په تړاو د پوښتنې کولو بهیر او شته انتخابونه وارزول شي.
دی همدا راز وايي، چې تر دې راپور وروسته به ولکر ترک، ریچارډ بېنټ او له افغانستانه دوه تنه به په یوه پینل کې ګډون وکړي او په افغانستان کې د بشري حقونو د وضعیت په تړاو به د شورا له نورو غړو سره خبرې-اترې وکړي.
په جینوا کې د افغانستان استازي ويلي، چې د ملګرو ملتونو د بشري حقونو په شورا کې به د افغانستان لپاره د بشري حقونو د ځانګړي راپورچي په توګه د ریچارډ بېنټ ماموریت وغزول شي.
د ملګرو ملتونو د بشري حقونو د شورا اووه پنځوسمه غونډه به د اکټوبر تر یوولسمې روانه وي.
په دې غونډه کې د افغانستان د بشري حقونو وضعیت په داسې حال کې ارزول کېږي چې طالبانو افغانستان ته د ملګرو ملتونو د بشري حقونو د ځانګړي راپورچي ریچارډ بېنټ پر ورتګ بندیز لګولی دی.
طالبانو ښاغلی بېنټ د دوی د ډلې پر خلاف په «پروپاګند» کولو تورن کړی او ویلي يې دي چې نوموړی واړه موضوعات لويوي.
ریچارډ بېنټ د طالبانو دې پرېکړي ته په غبرګون کې ويلي و، چې په افغانستان کې د بشري حقونو د نقض مستندولو ته دوام ورکوي.
ده تر اوسه په افغانستان کې د بشري حقونو د وضعیت په اړه درې راپورونه وړاندې کړي او په دې راپورونو کې يې له افغان ښځو سره د طالبانو چلند «د بشریت پر خلاف جنایت» بللی دی.
