اطلاعات روز: د کاناډا د بهرنیو چارو د وزيرې ملاني جولي په شمول د کاناډا درو وزیرانو په یوه ګډه اعلامیه کې له ښځو او نجونو سره د طالبانو چلند وحشتناک بللی دی.
دوی دا اعلامیه پر افغانستان د طالبانو د واکمنۍ د درېيمې کلیزې په مناسبت خپره کړې او ويلي يې دې چې د دې درو کلونو پر مهال په هیواد کې د ډيموکراسۍ، بشري حقونو او زده کړو په برخه کې د دوو لسیزو لاسته راوړنې له منځه وړل شوې دي.
د کاناډايي چارواکو په اعلامیه کې ويل شوي چې «له ښځو او نجونو سره د طالبانو چلند تر وحشت کم نه دی».
دوی زیاته کړې چې د ښځو او نجونو د بشري حقونو د فاحش نقض له وجې د هغوی پر تګ-راتګ او پوښاک محدودیت لګول شوی او همدا راز زده کړو، کار، روغتيايي خدماتو او عدالت ته لاسرسی نه لري.
د کاناډا چارواکو ويلي چې د افغانستان ښځې او نجونې په خپلو کورونو او ټولنو کې زنداني شوې او روښانه راتلونکې ته هیله نه لري.
همدا راز دوی ويلي چې د طالبانو تر حکومت لاندې د هزاره ګانو، سیکانو، هندوانو، احمدیانو او نورو ځپل شویو ډلو په شمول قومي او مذهبي لږکۍ له خشونت سره مخ دي او څنډې ته کړل شوې دي.
د کاناډا د درو وزیرانو په اعلامیه کې ويل شوي چې له سولییزو لاریونونو سره تاوتریخوالی او وحشت شوی او ګډونوال یې زنداني شوي دي.
طالبانو د تېرو درو کلونو پر مهال په ځلونو د ښځو لاریونونه ځپلي او معترضې ښځې يې نيولې او زنداني کړې دي.
کاناډايي چارواکو په خپله اعلامیه کې زیاته کړې چې افغانستان یو ځل بیا د ترهګرو ډلو په پټنځای بدل شوی دی او دا د افغانستان، سیمهییز ثبات او نړیوال امنیت لپاره وحشتناک پیغامونه لري.
دوی ويلي چې کاناډا له تروریزم سره د مبارزې د پیاوړتیا لپاره د افغانستان له ګاونډیانو سره همکاري کوي.
کاناډايي چارواکو له افغانستان سره د دې هیواد مرستو ته اشاره کړې او ويلي يې دې چې کاناډا له ۲۰۲۱ کال راهیسې په افغانستان کې بشرپالو مرستو ته ۲۴۳ میلیون ډالر او ۱۰۸ میلیون نور ډالر اساسي، روغتيايي او زده کړییزو اړتیاوو او د ښځو او نجونو د حقونو پیاوړتیا ته ځانګړي کړي دي.
دوی زیاته کړې چې کاناډا په تبعید کې د بشري حقونو د مدافعینو ملاتړ کړی او تر ۵۳۶۰۰ زیاتو افغانانو ته یې ځای ورکړی دی.
د کاناډا دولت ويلي چې د افغانستان په اړه د ملګرو ملتونو په مشرۍ د دوحې په بهیر کې یو اړخ فعال دی او د ښځو او نجونو د حقونو د احیا لپاره د دې بیهر ملاتړ کوي.
د کاناډا درو لوړپوړو چارواکو ويلي: «موږ د یوه داسې باثباته او سولییز افغانستان لپاره په مبارزه کې د افغانستان له خلګو سره یو چې هیڅ کس پکې تر ظلم لاندې ژوند ونه کړي.»
