اطلاعات روز: په اروپا او شمالي امریکا کې د افغانستان تبعید شوي خبریالان وايي، چې د دوی څېړنې ښيي چې طالبانو په وروستیو دریو کلونو کې ۳۰۹ خبریالان زنداني کړي دي.
د دې خبریالانو اعلامیه چې د کابل د سقوط او پر افغانستان د طالبانو د بیا واکمنېدو د درېيمې کلیزې په مناسبت خپره شوې، ويل شوي چې په دې شمېرو کې هغه موارد شامل دي چې تایید شوي او شونې ده چې واقعي شميرې زیاتې وي.
په تبعید کې افغان خبریالانو ويلي، چې دا شمیرې د جمهوریت په شلو کلونو کې د خبریالانو او رسنیزو کارکوونکو تر نیولو زیاتې دي.
د دې خبریالانو په اعلامیه کې ويل شوي چې د ۱۴۰۱ لمریز کال پر مهال ۱۶۳ پېښې، د ۱۴۰۲ لمریز کال پر مهال ۱۳۲ او د روان لمریز کال په پنځو میاشتو کې د خبریالانو او رسنیزو کارمندانو پر وړاندې د تاوتریخوالي ۱۱۷ پېښې شوې دي.
دوی ويلي، چې د طالبانو تر واکمنېدو وروسته د افغانستان د رسنیو شمېر هم په «بې مخینې» توګه کم شوی او اوس مهال یوازې ۳۵ سلنه هغه رسنۍ فعالیت کوي چې په تېر حکومت کې فعالې وې او نورو خپلو فعالیت درولی دی.
په تبعید کې افغان خبریالانو همدا راز ويلي، چې په هیواد کې د ښځینه خبریالانو شمېر ۹۵ سلنه کم شوی او اوس مهال له هغو یو زر او ۸۰۰ ښځینه خبریالانې چې د جمهوریت پر مهال يې کار کاوه، یوازې شاوخوا ۵۰ تنې خپل کار ته دوام ورکوي.
دوی په افغانستان کې د بیان د ازادۍ په اړه خپله ژوره انديښنه ښودلې او ویلي یې دي، چې طالبانو د تېر نظام لویه لاسته راوړنه چې د بیان ازادي وه له منځه وړې.
په تبعید کې افغان خبریالانو له ملګرو ملتونو او د بیان د ازادۍ له ملاتړو نړیوالو بنسټون غوښتي چې د افغانستان د رسنیو ملاتړ وکړي او هغه څه مستند کړي چې په افغانستان کې کېږي.
