اطلاعات روز: په تهران کې يو شمېر افغان پناه غوښتونکي د طالبانو د واکمنۍ د درېيم کال په درشل کې وايي چې له دې ډلې سره تعامل د ملګرو ملتونو د منشور، نړیوالو کنوانسیونو او بشري حقونو تر «پښو لاندې کول» دي.
دوی نن (یکشنبه، ۲۱ د زمري) د يوې اعلامیې په خپرولو سره د ملګرو ملتونو له چارواکو او د نړۍ له هیوادونو غوښتي چې له طالبانو سره د تعامل مخنیوی وکړي.
د دې پناه غوښتونکو په اعلامیه کې ويل شوي چې د افغانستان وګړي د طالبانو د «نامشروعې» او «مستبدې» ډلې له واکمنۍ څخه ستړي دي او نور ظلم، ځپنه، له زده کړو د نجونو محرومیت او له سياسي جوړښت څخه د ښځو حذفول د زغم وړ نه دي.
دې پناه غوښتونکو ويلي چې د افغانستان وګړي د ملګرو ملتونو تر څار لاندې د ټولشموله حکومت د جوړېدو ملاتړ کوي او له دې پرته د هیواد د اوسني کړکېچ بل حل نه ويني.
پر افغانستان د طالبانو د واکمنۍ د درېيم کال د پوره کېدو په درشل کې د معترضو ښځو او مدني فعالانو بېلابېلي ډلې اعلامیې خپروي او د دې ډلې په تړاو پر نړیوالو سیاستونو نیوکې کوي.
دوی له طالبانو سره د نړیوال تعامل د مخنیوي غوښتنه کوي او وايي چې نړیوال باید د افغانستان د خلګو ملاتړ وکړي.
