اطلاعات روز: فراه کې ځایي سرچینې خبر ورکوي، چې د دې ولایت په فراه رود ولسوالۍ کې «نامعلومو وسله والو» یو ځوان د توپنګچې په ډزو وژلی دی.
د سیمې یو اوسیدونکي د نوم نه یادولو په شرط وویل، چې دغه ځوان ولي جان نومیده او تېره ورځ (چهارشنبه، ۹ د غبرګولي) د فراه رود ولسوالۍ په بازار کې وژل شوی دی.
سرچینه زیاتوي، چې د دې وژنې لامل څرګند نه دی او وسله وال د ولي جان تر وژلو وروسته له سیمې تښتیدلي دي.
د دې پیښې په اړه تر اوسه طالب چارواکو څه نه دي ویلي.
په دې وروستيو کې د هېواد په بېلابېلو ولایتونو کې جنايي پېښې زياتې شوې دي.
تېره ورځ په ننګرهار کې هم یو تن ډاکټر د انسان تښتوونکو له لوري وژل شوی و.
