اطلاعات روز: ننګرهار کې ملي امنیت د داعش ډلې د چاودنو د مسوول په ګډون د انسان تښتوونکو د ګروپ درې غړي نیولي دي.
د ننګرهار د والي ویاند عطاالله خوږیاڼي نن (یکشنبه، ۱۰ د کب) اطلاعات روز ورځپاڼې ته وویل، د ملي امنیت اړوند «صفر دوه قطعې» تېره شپه د ننګرهار ولایت چپرهار ولسوالۍ شولاني سیمه کې ځانګړي شپني عملیات ترسره کړي.
د ښاغلي خوږیاڼي په وینا، په دغو عملیاتو کې یې د داعش ډلې هغه غړی نیولی چې جلال اباد ښار کې د چاودنو مسوول و.
خوږیاڼي وایې، نیول شوي کس د یادې دندې ترڅنګ د ټپي شویو داعش وسله والو انتقال، ماین جوړولو او لېږدولو په برخه کې هم فعالیت کاوه.
خوږیاڼی زیاتوي: «تېره شپه د ملي امنیت ځواکونو په چپرهار ولسوالۍ کې د عملیاتو پرمهال د داعش ډلې هغه غړی نیولی چې جلال اباد ښار کې یې د چاودنو مسوولیت درلود.»
داعش ډلې تراوسه په دې اړه څه نه دي ويلي.
خوږیاڼي همداراز زیاتوي په ورته مهال د ملي امنیت ځواکونو په جلال اباد ښار او بټي کوټ ولسوالۍ کې د انسان تښتونکو د ګروپ دوه غړي نیولي دي.
د هغه په خبره چې نیول شوي کسان «ګلون» د شیرزادو ولسوالۍ او «شکرالله» د بټي کوټ ولسوالۍ اصلي اوسېدونکي دي.
خوږیاڼی زیاتوي چې ګلون نومي به مسوولينو، سوداګرو، پانګوالو او نورو ته د ټیلیفون په وسيله د داعش له ادرسه ګواښونه کول او ترې يې پيسې غوښتې.
