اطلاعات روز: د خوړو نړیوال پروګرام اعلان کړی چې په بغلان ولایت کې سېلابونو تر ۳۰۰ ډېر کسان مړه او ۱۰۰۰ کورونه یې ویجاړ کړي دي.
دغې ادارې نن (شنبه، ۲۲ د غویي) پر ایکس په خپله پاڼه د دغه شمیرو په اعلانولو سره ویلي، چې دا مهال سیلاب ځپلو ته «غني شوي بیسکویټ» ویشي.
تردې وړاندې په بغلان کې ولسي سرچینو اطلاعات روز ورځپاڼې ته ویلي وو، چې سیلابونو یوازې د دغه ولایت په مرکزي بغلان او برکه ولسوالیو کې د ۲۵۰ کسانو ژوند اخیستی دی.
دغه راز د کډوالۍ نړیوال سازمان مسوولینو د فرانسې خبري آژانس ته ویلي، چې په دغه ولایت کې د سیلابونو له کبله د مړو شمیر تر ۲۰۰ اوښتی دی.
بغلان کې د سیمه ییزو سرچینو په وینا، سېلابونو تر ټولو ډېر تلفات او زیانونه په مرکزي بغلان او برکه ولسوالیو کې اړولي دي.
د سرچينو د معلوماتو له مخې، دا مهال ترانسپورټي لارې بندې دي او يوازې د طالبانو چورلکې له هوا څخه خلکو ته خوراکي توکي غورځوي.
د مرکزي بغلان ولسوالۍ اوسېدونکي هم وايي، چې راوتلو سېلابونو د «شیخ جلال»، «چاه آبیها»، «لقیها» او «نوآباد کندهاریان» سيمو کې ډېر زيانونه اړولي دي.
د دغو دوو ولسوالیو اوسېدونکي وايي، چې دوی خپل هرڅه یې له لاسه ورکړی او په عاجله توګه مرستې او سرپناه ته اړتیا لري.
له پرون راهیسې د بغلان په مرکز پلخمري ښار، ډنډغوري او ګذرګاه نور په ولسوالیو کې هم سیلابونو تلفات او زیانونه اړولي دي؛ خو تر دې دمه کره شمیرې په لاس نشته دي.
په تخار، بدخشان، سمنګان، هرات او غور ولایتونو کې هم سیلابونو خلکو ته درانه ځاني او مالي زیانونه اړولي دي.
د طالبانو ځایي مسوولینو تراوسه د سیلابونو د تلفاتو په اړه شمیرې نه دي خپرې کړي.
