اطلاعات روز: په افغانستان کې د ملګرو ملتونو د مرستندوی پلاوي دفتر (يوناما) د افغانستان د «خبريالانو د درناوي، جدي ملاتړ او خونديتوب» غوښتنه کړې.
په کابل کې د ملګرو ملتونو د عمومي منشي ځانګړې استازې رزا اوتنبايوا نن (جمعه، ۱۴ د غوايي) د رسنيو د ازادۍ د نړيوالې ورځې په مناسبت د افغانستان د خبريالانو درناوی کړی او ويلي يې دې چې دا خبريالان له زياتو خطرونو سره-سره د هيواد خلګو ته د دقيقو معلوماتو رسولو لپاره نهايي هڅه کوي.
اوتنبايوا زياته کړې: «د دوی کار د يوه اګاه، پرمختللي او مرفه ملت لپاره ضروري او د زده کړو، چاپېريال، روغتيا، اقتصاد او ښې حکومتولۍ په څېر مهمو برخو کې د ټولو افغانانو لپاره حياتي دی. د دوی زړورتيا د ستاينې وړ ده او دا اتلان (خبريالان) بايد وهڅول شي او ملاتړ او خونديتوب يې وشي.»
طالبانو پر افغانستان تر واکمنېدو وروسته د دې هيواد پر رسنيو سخت محدوديتونه لګولي دي. دې ډلې بيا – بيا خبريالان ګواښلي او زنداني کړي دي.
د افغانستان د خبريالانو مرکز وايي چې د وروستي يوه کال پر مهال يې د رسنيزو او خبريالانو د ازادۍ د نقض ۱۳۶ پېښې ثبت کړې دي چې په دې کې د طالبانو له لوري ۷۳ پېښې د ګواښ او ۷۴ د خبريالانو د زنداني کولو پېښې دي.
د طالبانو محدوديتونو او ځپنې ښځينه خبريالانې زياتې اغېزمنې کړې دي.
د ملګرو ملتونو ښځينه برخې د رسنيو د ازادۍ په نړيواله ورځ ويلي چې په افغانستان کې ۸۰ سلنه ښځې د بنديزونو، ځورونې او ويرونې له کبله اړې شوې دي چې له کاره لاس واخلي.
