اطلاعات روز: د افغانستان لپاره د ملګرو ملتونو د بشري حقونو ځانګړي راپورچي ريچارډ بينټ په هرات کې پر شيعه لمونځ کوونکو بريد ته په غبرګون کې غوښتنه کړې چې پر هزاره ګانو او شيعه ګانو د بريدونو مخه دې ونيول شي.
ښاغلي بينټ نن (سېشنبه، ۱۱ د غوايي) پر ايکس د يوه پوسټ په خپرولو سره دا بريد غندلی دی.
د افغانستان لپاره د بشري حقونو ځانګړي راپورچي ويلي چې د دې هيواد ټول وګړي بايد وکولای شي چې په ارامۍ سره عبادت وکړي.
ده زياته کړې: «زه د هزاره ګانو او شيعه ګانو لپاره د خونديتوب او عدالت غوښتونکی يم چې په پر له پسې توګه په نښه کېږي، د هرات په شمول.»
د ملګرو ملتونو د بشري حقونو ځانګړي راپورچي د دې بريد د قربانيانو له کورنيو سره خواخوږي ښوولې.
په ملګرو ملتونو کې د افغانستان د استازولۍ سرپرست نصير احمد فايق هم دا بريد غندلی دی.
ښاغلي فايق ويلي: «د افغانستان پر شيعه ټولنو هدفي بريدونه او په مسجدونو کې دننه د ماشومانو او بې ګناه وګړو د وينو تويول د سختې غندنې وړ دي.»
ده زياته کړې: «په تأسف سره چې دا بريدونه له مخنيوي، تحقيقاتو او پوښتنې پرته دوام لري او دا په داسې حال کې چې طالبان په افغانستان کې د امنيت د تأمينېدو دعوه کوي.»
تېر ماښام (دوشنبه، ۱۰ د غوايي) نامعلومو وسلوالو د هرات ولايت د ګذرې ولسوالۍ په «محمدیه» ښارګوټي کې د امام زمان مسجد پر شيعه لمونځ کوونکو بريد وکړ.
ځايي سرچينو اطلاعات روز ورځپاڼې ته وويل چې په دې بريد کې د يوه ماشوم او د مسجد د ملا په ګډون شپږ تنه ووژل شول.
د طالبانو کورنيو چارو وزارت هم دا بريد تاييد کړ او ويې ويل چې په دې بريد کې شپږ تنه ووژل شول او يو تن ژوبل شو.
تر اوسه هيڅ ډلې او فرد د دې بريد مسوليت نه دی منلی، خو تر دې وړاندې په افغانستان کې پر شيعه ګانو د بريدونو مسوليت داعش ډلې منلی دی.
