اطلاعات روز: په قطر کې د افغانستان لپاره د امريکا د سفارت شاژدافيره کيرن ډيکر وايي چې د طالبانو د بنديزونو په مخالفت کې د افغانستان د خلګو تر څنګ ده او د بدلون راوستلو لپاره له خپلو هڅو نه پر شا کېږي.
دې نن (پنجشنبه، ۶ د غوايي) د بشري حقونو په اړه د امريکا د بهرنيو چارو د وزارت د راپور په اړه ويلي چې پر ښځو لګېدلي بنديزونه، د خپلواکو رسنيو له منځه وړل، پر سولييزو لاريونونو بريد او مذهبي محدوديتونه غندي.
ډيکر ليکلي: «موږ هره ورځ له دې بنديزونو سره خپل مخالفت ښيو. زه غواړم چې د افغانستان خلګ پوه شي چې په دې لار کې يوازې نه دي او موږ به هيڅکله هم د بدلون راوستلو لپاره له خپلو هڅو پر شا نشو.»
د امريکا د بهرنيو چارو وزارت د بشري حقونو په تړاو په خپل کلني راپور کې ويلي چې د تېر ميلادي کال پر مهال د هغو اوامرو له وجې چې زده کړو او کار ته د ښځو لاسرسی محدودوي، د ښځو حقونه په پام وړ کچه بدتر شوي او په پايله کې يې د ښځو فعاليت تر کور پورې محدود شوی دی.
په دې راپور کې وژنه، سخت جسمي کړاو، د ښځو د ژوند سخت او ګواښوونکي شرایط، ناعادلانه نيونې او انسان تښتونې، ورکيدنې، په خصوصي حريم کې خپلسرې او غير قانوني لاسوهنه او د يوه خپلوان د احتمالي تخلفاتو په موخه د کورنۍ د غړو مجازات د بشري حقونو د نقض موارد بلل شوي دي.
د امريکا بهرنيو چارو وزارت هم په خپل راپور کې ويلي و چې د طالبانو تر واکمنۍ لاندې افغانستان کې «د قانون د حاکميت په تړاو پراخه بې پروايي او د هغو کسانو لپاره رسمي مصونيت شته دی چې د بشري حقونو د نقض مسوول دي».
