اطلاعات روز: د ملګرو ملتونو د بشري حقونو د شورا د کاري ارزونې دورهيي ډله د افغانستان د بشري حقونو د راپورونو ارزولو لپاره راتلونکې اونۍ غونډه کوي.
ټاکل شوې چې دا غونډه د اپريل پر ۲۹مه په جينوا کې جوړه شي.
افغانستان يو له هغو ۱۴ هيوادونو څخه دی چې د کاري ارزونې د ډلې له لوري په هغې غونډې کې چې د اپریل له ۲۹مې څخه د می مياشتې تر ۱۰ نېټې پورې جوړېږي ارزول کېږي.
د بشري حقونو د شورا په اعلاميه کې راغلي، هغه اسناد چې پر بنسټ یې ارزونه کېږي په هغو کې تر ارزونې لاندې د هيواد ملي راپور، د ډلو او د بشري حقونو د خپلواکو کارپوهانو راپور، د بشري حقونو د بنسټونو او د مدني ټولنې د ډلو معلومات شامل دي.
د ۲۰۰۸ کال په اپريل کې د دې بهير له پېل راهيسې دا د هيوادونو د راپور ارزولو څلورمه دوره ده.
د بشري حقونو د شورا په اعلاميه کې راغلي چې په څلورمه دوره کې تمه کېږي چې هيوادونه د بشري حقونو په برخه کې پر پرمختګونو او هغو فعاليتونو خبرې وکړي چې د تېري دورې پر مهال يې د وړانديزونو د تطبيق لپاره ژمنه کړې وه.
د راتلونکې اونۍ په غونډه کې به د نصير احمد انديشه په مشرۍ د افغانستان پلاوی هم ګډون وکړي.
همدا راز د بروندي، هند او هالنډ هيوادونو استازي د افغانستان په ارزونه کې د راپور ورکوونکي په توګه کار کوي.
افغانستان داسې مهال د بشري حقونو په شورا کې تر ارزونې لاندې دی چې د طالبانو تر واکمنېدو وروسته په دې هيواد کې د بشري حقونو وضعيت مخ پر خرابېدو دی.
طالبانو د ښځو او نجونو په ګډون د افغانستان د وګړو پر حقونو او ازاديو سخت محدوديتونه لګولي دي.
