اطلاعات روز: په نیمروز کې د طالبانو د والي له دفتره په خپره شوې خبرپاڼه کې راغلي چې له ایران سره د ورېښمو پوله تر درې ساعته بندېدو وروسته بیرته د هر ډول تګ راتګ پر مخ پرانیستل شوه.
د دې خبرپاڼې له مخې یاده پوله نن (پنجشنبه، ۱۶ د وري) د ماپښین له دوو بیا تر پنځو بجو تړلې وه او د طالبانو او ايراني لوري تر منځ تر خبرو وروسته بیرته پرانيستل شوې.
په سیمه کې یوې سرچينې اطلاعات روز ورځپاڼې ته ويلي چې طالبانو تر هغه وروسته یاده لاره د تګ-راتګ پر مخ وتړله چې کله ایراني پوله ساتو پر پوله له یوه افغان سره ناوړه چلند وکړ.
همدا راز، ځينو نورو سرچینو اطلاعات روز ته ویلي چې د ورېښمو پر پوله نن تر غرمې وروسته د ایراني پوله ساتو او طالبانو ترمنځ نښته وشوه او له امله يې لار وتړل شوه.
په نيمروز کې د طالبانو د والي له دفتر څخه په خپره شوې خبرپاڼه کې د ايراني او طالب پوله ساتو تر منځ د نښتې خبرونه رد شوي خو له افغان مسافر سره د ایراني پوله ساتو د ناوړه چلند په اړه يې څه نه دې ويلي.
څو ورځې وړاندي هم د طالبانو او ایراني پوله ساتو تر منځ ياده لار تر لفظي شخړي وروسته څو ساعته تړل شوې وه.
په افغانستان کې واک ته د طالبان تر رسېدو روسته له ګاونډیو هېوادونو سره پر پولو نښتې زياتې شوې دي.
