اطلاعات روز: کونړ کې ځايي سرچینې وايي چې داعش وسلوالې ډلې د دې ولایت د څوکۍ ولسوالۍ د دېوه ګل درې په «چلس» سیمه کې د طالبانو پر وړاندې د جګړې تازه اعلان کړی او له خلګو يې غوښتي چې د طالبانو ليکې پرېږدي.
یوې سیمهییزې سرچینې چې نه یې غوښتل هویت یې څرګند شي اطلاعات روز ته ویلي چې داعش ډلې دا خبرداری درې ورځې وړاندې (۱۰ د وري) د جمعې د لمانځه پر مهال ورکړی.
سرچینې ویلي؛ داعش جنګیالیو په دې سیمه کې ولسي خلکو ته ويلي چې د طالبانو ليکې پرېږدي او له هغوی سره دې له همکارۍ لاس واخلي. دوی خلګو ته ګواښ کړی چې په دې برخه کې د سرغړونې په صورت کې به وژل کېږي.
د سرچینې په وینا، داعش وسلوالو د طالبانو پر وړاندې د جګړې اعلان کړی او له سیمهییزو خلکو یې په دې برخه کې د مرستې غوښتنه کړې.
سرچینه زیاتوي چې د جمعې د لمانځه پر مهال د طالبانو یو شمېر جنګیالي هم موجود و خو د داعش ډلې له وېرې یې کوم غبرګون نه دی ښودلی.
د داعش ډلې د دې جګړییز خبرداري په تړاو کونړ کې د طالبانو ځايي چارواکو تر اوسه څه نه دې ویلي.
په داسې حال کې چې داعش کونړ کې د طالبانو پر وړاندې د جګړې خبرداری ورکوي او له طالبانو سره د همکارۍ په برخه کې ولسي خلګ ګواښي، دوه نیمې میاشتې وړاندې يې په همدې سیمه کې له طالبانو سره د همکارۍ په تور له دوو کسانو سرونه هم پرې کړي وو.
