اطلاعات روز: ننګرهار کې د طالبانو سیمه ییز چارواکي وایي، چې د دغه ولایت په یو شمیر ولسوالیو کې د تیرې ورځې د شدید باران له کبله سیلابونه راوتلي چې له امله یې خلکو ته درانه مالي زیانونه اوښتي.
د ننګرهار اطلاعاتو او کلتور ریاست لپاره د طالبانو د اطلاعاتو امر صدیق الله قریشي وایي، چې سیلابونو تېره ورځ (جمعه، ۱۰ د وري) د دغه ولایت په لعلپورې، نازیانو، کوټ، بټي کوټ، مومندرې، اچین او یو شمیر نورو ولسوالیو کې سلګونو جریبه کرنیزه ځمکه او سلګونه څاروي وړي او دغه راز یې په زیاته اندازه د استوګنې کورونه هم نړولي او زیانمن کړي دي.
نوموړی زیاتوي د مومندرې ولسوالۍ په دامان، هزارناو، ګردي غوث او ډکې سيمو کې سېلابونو د جلال اباد – تورخم لويې لارې ځينې برخې ویجاړې او په سلګونه جریبه کرنیزه ځمکه او فصلونه يې له منځه وړي او دغه راز د تورخم – جلال اباد لویه لاره په ځينو سيمو کې د موټر پرمخ تړل شوې.
هغه په دغه سیلابونو کې د اوښتو ځاني تلفاتو په اړه معلومات ورنه کړل، خو ویې ویل، چې د سروې ټیمونه یې زیانمنو شویو سیمو ته استولي چې جزیات به یې وروسته له رسنیو سره شریک کړي.
د لعل پورې ولسوالۍ اوسیدونکی نعمت الله چې سیلابونو او ږلۍ یې کرنیزه ځمکه تخریب کړې او دغه راز یې په لس جریبه ځمکه کرل شوې هندواڼې سیلاب وړي د طالبانو له حکومت او مرستندویه ادارو د مرستې غوښتنه کوي.
نعمت الله وویل: «په لس جریبه ځمکه مې هندواڼې کرلې وي، خو تېره ورځ ناڅاپي باران، ږلۍ او سیلابونو هر څه له منځه یوړل، د مرستې غوښتنه کوو ځکه زمونږ د ټول کال خواري له خاورو سره خاورې شوه.»
دغه راز د ننګرهار په نورو سیمو کې هم د سیلابونو د راوتلو خبر ورکړل شوی، خو تر اوسه یې د زیانونو په اړه طالب چارواکو له رسنیو سره معلومات نه دي کړي.
ننګرهار کې تېر کال هم سیلابونو خلکو ته ځاني او مالي زیانونه اړولي وو.
