اطلاعات روز: په ملګرو ملتونو کې د پاکستان دايمي استازي منير اکرم د دې سازمان له امنيت شورا غوښتي چې له طالبانو دې وغواړي چې د پاکستاني طالبانو تخریک (ټي ټي پي) او ورسره تړلو ډلو سره اړيکې پرې کړي او د پاکستان پر خاوره دې د دې ډلې د بريدونو مخه ونيول شي.
د پاکستان استازي دا څرګندونې تېره شپه (چهارشنبه، ۱۶ د کب) د کابل پر وخت د افغانستان په اړه د ملګرو ملتونو د امنيت شورا په غونډه کې وکړې.
ده همدا راز له ملګرو ملتونو وغوښتل چې تجهيزاتو او پرمختللو وسلو ته د پاکستاني تحريک طالبانو د لاسرسي د څرنګوالي او د مالي سرچينو د پيژندنې په تړاو څېړنې وکړي چې د ۵۰ زره جنګياليو په ساتنه او تروريستي عملياتو په ترسره کولو کې ورسره مرسته کوي.
د پاکستان استازي ټينګار وکړ چې له طالبانو سره د تعامل لپاره په هره راتلونکې جوړېدونکې تګلاره کې بايد له تروريزم سره مبارزه تر ټولو لومړی لومړيتوب وي.
ده خبرداری ورکړ چې که نړيواله ټولنه د پاکستاني طالبانو تحريک مهار نه کړي، دا ډله چې د القاعدې او يو شمېر دولتي ملاتړو له لوري حمايه کېږي، ښايي په يوه نړيوال تروريستي ګواښ بدل شي.
پاکستان تر دې وړاندې هم بیا – بيا له طالبانو غوښتي چې له ټي ټي پي سره دې خپلې اړيکې پرې کړي او له افغانستان څخه د پاکستان پر خاوره دې د دې ډلې د بريدونو مخه ونيسي.
خو، طالبان دا ادعا ردوي او وايي، چې هيڅ ډلې ته اجازه نه ورکوي چې د افغانستان خاوره د بل هيواد پر ضد وکاروي.
له طالبانو سره د صبورانه تعامل غوښتنه
د افغانستان په اړه د ملګرو ملتونو د امنيت شورا په غونډه کې د چين او روسيې استازو له طالبانو سره د «رغنده او صبورانه تعامل» غوښتنه کړې.
په ملګرو ملتونو کې د چين استازي ګنګ شوان په دې غونډه کې وويل، چې له طالبانو سره صبورانه تعامل پر نړۍ د دې ډلې باور زياتوي.
ده د «باور جوړونې» لپاره غوښتنه وکړه چې پر طالبانو لګېدلي بنديزونه دې اصلاح او د دې ډلې پر غړو د سفر لګېدلی ممنوعيت دې ختم شي.
په ملګرو ملتونو کې د روسيې د دايمي استازي مرستيالې آنا اوستیګنیوا په دې غونډه کې وويل، چې په افغانستان کې شته ننګونې له طالبانو سره له رغنده تعامل پرته د حل وړ نه دي.
دې وويل ،چې د طالبانو تر واکمنېدو وروسته د هيلو بر خلاف په افغانستان کې کورنۍ جګړه پېل نشوه او زياته يې کړه چې د داعش په څېر ترهګرو ډلو د امريکايي او بهرنيو ځواکونو د شتون پر مهال په دې هيواد کې خپل حضور زيات کړی دی.
روسيې او چين پر افغانستان د طالبانو له واکمنېدو راهيسې له دې ډلې سره د پراخ تعامل غوښتنه کړې.
چين لومړنی او يوازينی هيواد دی چې د طالبانو سفير يې رسما منلی دی.
