اطلاعات روز: هلمند کې ځایي سرچینې وایي، چې د طالبانو استخباراتو په دې ولایت کې د اغا لالي په نوم د تېر نظام د ملي امنیت یو مدیر او ۷ تنه کارکوونکي نیولي دي.
یوې سرچینې د نوم نه یادولو په شرط وویل، چې د طالبانو استخبازاتو تېره ورځ (یکشنبه، ۱۳ د کب) د هلمند په مرکز لښکرګاه کې د اغا لالي په کور چاپه وهلې او هغه یې نیولی دی.
سرچینه زیاتوي، اغا لالي په تېر نظام کې د لښکرګاه د ملي امنیت ریاست کې د ښاري مدیر په توګه دنده ترسره کوله، چې د طالبانو له راتګ وروسته په کور ناست او د دې ښار لومړۍ ناحیې اړوند د خپل کور مخې ته یې د خوراکي توکو پلورنځی جوړ کړی و.
د سرچینې په خبره، طالبانو د یاد مدیر د نیولو ترڅنګ د هغه له کور څخه یو شمیر اسنادونه هم وړي دي.
هلمند کې د طالبانو استخباراتو په دې اړه څه نه دي ویلي، خو ویل کېږي چې تېره ورځ د دې ولایت په مرکز لښکرګاه کې یو شمیر وسلې نیول شوي وې، چې په همدې تور بیا اغا لالی نیول شوی دی.
ورته مهال هلمند کې یو شمیر نورې سرچینې خبر ورکوي، چې د طالبانو استخباراتو دغلته له بیلابېلو سیمو د پخواني حکومت د ملي امنیت اووه تنه نور کارکوونکي نیولي دي.
سرچینو د نیول شویو کسانو په اړه نور معلومات نه دي ورکړي او نه هم طالبانو په دې اړه څه ویلي دي.
واک ته د طالبانو له رسېدو وروسته د طالبانو د مشر هبت الله اخوندزاده د عمومي عفوې سره سره افغانستان کې د پخواني جمهوري نظام په سلګونو نظامي او ملکي کارکوونکي نیول شوي، بندیان شوي، شکنجه شوي او وژل شوي دي.
