لیکوال: محمد ننگیالی
د سيمهييزو ارګانونو د خپلواکې ادارې د ولايتونو د همغږۍ رييسې يلدا رويان تازه له خپلې دندې استعفا ورکړې او له دغې استعفا سره يې ګڼ شمېر هغه ثبوتونه خپاره کړي چې ښيي دغه اداره اوس د شميم کټوازي په مستقله اداره بدله شوې ده.
يلدا رويان چې په جنډر او د ښځو په اړه په مطالعاتو کې ماسټري لري، په خپله استعفا کې چې يوه کاپي يې اطلاعات روز ورځپاڼې ته هم رسېدلې، يوولس هغه ټکي ياد کړي دي چې دا يې له خپلې دندې استعفا کولو ته مجبوره کړې ده.
دغه يوولس ټکي د مشت نمونه از خروار پر اساس، د هغو نارواوو کوچنۍ يادونې دي چې د سيمهييزو ارګانونو اداره يې هلته د شميم کټوازي تر ورتګ وروسته د تعصب او بيسوادۍ په ډيران بدله کړې ده.
اغلې رويان د خپلو ټولو ادعاوو لپاره ثبتونه هم لري چې اطلاعات روز ته يې سپارلي او موږ يې کټ مټ دلته خپروو.
د اغلې رويان په استعفا کې ويل شوي، شميم کټوازی په دري ژبه نه پوهېږي او له همدې امله د خپلو هغو کارکوونکو له استعداده هم ناخبره دی چې په دري ژبه خبرې کوي.
دې ليکلي چې په همدې خاطر چې د سيمهييزو ارګانونو د رييس دري نه ده زده او دا په دري خبرې کوي، په ډېرو داسې جلسو کې چې چارې يې د دې د رياست اړوندې وې، برخه نه ده ورکول شوې.
يلدا رويان په دې سربېره وايي، شميم کټوازي او ټيم يې د احمد شاه بابا له نامه هم غلطه ګټه اخيستې او په دروغو يې د خلکو د احساساتو راپارولو او خپل يوه معين د بدنامولو لپاره اوازه خپره کړه چې معين د احمد شاه بابا پر نامه خط کش کړی دی.
دې ليکلي، ټول افغانان احمد شاه بابا د يوه قهرمان په توګه پېژني، خو د شميم کټوازي ټيم حتا خپلو موخو ته د رسېدو لپاره له دغه نامه څخه هم ناوړه ګټه واخيسته.
په سيمهييزو ارګانونو اداره کې د ښځو ځورول، د شخصيت ترور او دسيسې جوړول نور لاملونه دي چې يلدا رويان يې استعفا ته اړه کړې ده او ويلي يې دي چې داسې ښکاري د ادارې رييس هم په دغو جنسي ځورونو خوشحاله دی.
دا وايي، د بهرنيو ډونرانو جلسې يې تنظيم کړې دي، خو شميم کټوازي د خپلې بېسوادي له امله په دغو جلسو کې برخه نه ده اخيستې، ځکه حتا نه يې شوای کولای چې د بهرنيو په جلسو کې د خپلې ادارې په اړه څه ووايي.
دا د لطيفې فرهمند په نامه د يوې هزاره مور خبره هم کوي چې په اولاد ناروغه وه، روغتون ته يې وړې وه او شميم کټوازي له دندې پسې ايسته کړه.
د د غې مور څلور اولادونه په يوه وار شوي او په روغتون کې ساتل کېدل، خو شميم کټوازي چې له دندې شړلې، د پيسو د نه شتون له امله يې ماشومان له روغتونه ايستلي او يو يې مړ شوی دی.
د لطيفې فرهمند د منفکي په اړه د سيمهييزو ارګانونو د ادارې د بشري سرچينو د رييس ايمل صالحزي په لاسلیک د رييس جمهور د هداياتو د تعقيب رياست ته د شميم کټوازي په مشوره ناقانونه مکتوب لېږل شوی او په کې ويل شوي دي چې د اغلې فرهمند پر ځای بايد د فضل محمد په نامه يو کس مقرر شي.
اغلې رويان وايي، شميم کټوازي پرته له دې چې مشوره وکړي، په خپل سر د خپل ولايت کسان په رياستونو کې په ناقانونه توګه مقرر کړي دي.
دا د خپلې دغې ادعا لپاره د اسدالله په نامه د يوه کس يادونه کوي چې د دې رياست ته د يوه برحاله پښتون کارکوونکي چې د شميم کټوازي د ولايت نه و، پر ځای ورلېږل شوی، خو دې چې يې مخه نيولې، د شميم د سکرټر له خوا اخطارونه ورکول شوي دي.
د دې په خبره، شميم کټوازی نه يوازې له نورو قومونو بلکې له هغو پښتنو سره هم تعصب کوي چې د ده د ولايت نه وي.
دې ويلي، د سيمهييزو ارګانونو د ادارې رييس د بېسواده او بې تجربې هلکانو يوې ډلې محاصره کړی، د معينانو صلاحيتونه يې ورڅخه اخيستي او دغه ډله دومره بې نزاکته دي چې حتا په جلسو کې د ناستې په ادابو نه پوهېږي.
که څه هم يلدا رويان ادعا کړې چې د خپلې هرې خبرې لپاره ثبوت لري او ټول ثبتونه او اسناد يې خپاره کړي هم دي، خو د سيمهييزو ارګانونو ادارې ويلي دي چې دغه تورونه بې اساسه دي.
