اطلاعات روز: د طالبانو سترې محکمې اعلان کړی، چې د دې ډلې د مشر هبت الله اخوندزاده له تایید وروسته یې د غزني ښار په یو لوبغالي کې د قتل په تور پر دوو کسانو د «قصاص حکم» اجرا کړی دی.
دغې محکمې د يوې اعلاميې په خپرولو سره ويلي، چې دغه حکم نن (پنج شنبه، ۳ د کب) د غزني د مرکز اړوند د «علي بابا» کلي د فوټبال په لوبغالي کې د طالب چارواکو او يو شمېر کسانو په شتون کې د تورن کسانو په «وژلو» سره عملي شوی دی.
ځايي سرچينو اطلاعات روز ته وویل، چې د «قصاص حکم» د ګڼو کسانو په حضور کې د تورنو په «ویشتلو» سره عملي شو.
د سرچينې د معلوماتو له مخې، هر یو له دغو کسانو پنځه-پنځه مرمۍ ویشتل شوي دي.
د طالبانو سترې محکمې تورن کسان «سید جمال» د سید محمود زوی، د میدان وردګو ولایت د سیداباد ولسوالۍ د «لوره» کلي اوسېدونکی او «ګل خان» د شاه ولي زوی د غزني د اندړو ولسوالۍ اوسېدونکی پیژندلي دي.
د دغې محکمې په اعلاميه کې ويل شوي چې سيد جمال د سلطان محمد د زوی امیر محمد چې د ميدان وردګ د سيداباد ولسوالۍ د لوره کلي اوسېدونکی و په قتل تورن او ګل خان د نظرالدين د زوی محمد قاسم چې د غزني ولایت د اندړو ولسوالۍ اوسېدونکی دی په قتل تورن پیژندل شوی.
دغې محکمې ویلي، چې دواړه قتلونه په چاقو ترسره شوي دي.
د طالبانو سترې محکمې ویلي، چې دغو کسانو ته د اعدام سزا د دغې ډلې د لومړنیو، منځنیو او وروستیو محکمو له خوا صادره شوې او د هبت الله اخوندزاده له خوا تایید شوې ده.
طالبانو تر دې وړاندې په فراه او لغمان ولایتونو کې هم پر دوو تنو د قصاص حکم په عام محضر کې اجرا کړی دی.
دغې ډلې په افغانستان کې د واک له ترلاسه کولو وروسته په پرپسې ډول تورنو کسانو ته په عام محضر کې سزا ورکړې ده.
د بشري حقونو بنسټونه په عام محضر کې خلکو ته سزا ورکول د هغوی انساني کرامت ته سپکاوی ګڼي او د بندولو غوښتنه یې کوي.
