اطلاعات روز: د سرېلانکا او افغانستان د کرکيټ لوبډلو تر منځ نن (دوشنبه، ۳۰ د سلواغې) د درو شل اوريزو لوبو د لړۍ په دويمه لوبه کې سرېلانکا افغانستان ته د ۷۲ منډو په توپیر ماتې ورکړه او د شل اوريزو لوبو لړۍ يې وګټله.
د افغانستان او سرېلانکا تر منځ په دويمه شل اوريزه لوبه کې هم ټاس افغان لوبډلمشر وګاټه او يو ځل بيا يې د توپ اچونې پرېکړه وکړه.
سرېلانکا د شپږو لوبغاړو په له لاسه ورکولو افغان لوبډلې ته د ۱۸۸ منډو لوی هدف ورکړ. د سرېلانکا له لوري سمارا ويکرما تر ټولو ډېري ۵۱ منډې وکړې.
د افغانستان له لوري د توپ وهنې پيل ښه نه و او پر شپږو منډو يې د پيل توپ وهونکی حضرت الله ځاځی له لاسه ورکړ، تر دې وروسته هيڅ افغان لوبغاړي ونشوای کولای چې په ميدان کې پاتې شي او اوږده او لوبه ګټونکې پاڼۍ ولوبوي.
د افغانستان له لوري کريم جنت تر ټولو ډېري ۲۸ منډې وکړې.
د يادونې وړ ده چې د سرېلانکا ليګ سپينر بالر وينندو هسارانګا په نننۍ لوبه کې د دوو افغان لوبغاړو په سوځولو سره خپلې سل ويکيټې هم پوره کړې چې تر راشد خان وروسته په دويمه کچه تېزي سل ويکيټې ګڼل کېږي.
سرېلانکا تر دې وړاندې په لومړۍ شل اوريزه لوبه کې هم افغانستان ته ماتې ورکړې وه. همدا راز يې يوه ټيسټ لوبه او درې پنځوس اوريزې لوبې هم په يو اړخيزه توګه له افغانستان څخه ګټلې دي.
د افغانستان او سرېلانکا تر منځ به وروستۍ شل اوريزه لوبه د فبروري پر ۲۰ کېږي.
