اطلاعات روز: د ننګرهار مرکز جلال اباد ښار اړوند باچا خان مزار کې د سولې او پرمختګ تر عنوان لاندې د کتابونو درې ورځنی نندارتون پرانیستل شو.
د کتابونو دغه نندارتون د اماني فکري ټولنې له لوري جوړ شوی. د دغه نندارتون مسوول ډاکتر ننګ کاموي نن (یکشنبه، ۳ د کب) اطلاعات روز ورځپانې ته وویل، په دې نندارتون کې بېلابېل علمي، تاریخي، سیاسي او ټولنیز اثار نندارې ته اېښودل شوي چې موخه یې په افغاني ټولنه کې د مطالعې فرهنګ دودول دي.
کاموي زیاته کړه: «موخه مو له دغه نندارتون دا ده، چې ځوانانو ته نوی فکر ورکړو چې له کتاب سره اشنا شي او خپل وخت بیځایه تیر نه کړي او مطالعې ته مخه کړي تر څو د کتاب لوستنې دود عام شي.»
د پوهنتون استاد مجاور احمد زیار بیا اطلاعات روز ورځپاڼې سره په خبرو کې وویل، د کتابونو دا ډول نندارتون جوړول د ځوانانو په فکري بدلون کې مثبت رول لوبولی شي. استاد زیاتوي: «دغه ډول د کتابونو نندارتونونه کولای شي ځوانان وهڅوي چې کتاب مطالعه کړي او ځان له نړۍ خبر کړي، یانې مستقیم ځوانان هڅولی شي چې کتاب لوستنې ته مخه وکړي او نور هم وهڅوي.»
په ورته مهال استاد نجیب منلي بیا هر کال د دا ډول نندارتون د جوړیدو غوښتنه وکړه. نوموړي له اطلاعات روز ورځپاڼې سره په خبرو کې هیله مندي وښوده چې د دې نندارتون په پرانیستل کېدو سره به د مطالعې رواجولو ترڅنګ کتاب پیرودلو ته هم بازار موندنه وشي.
استاد منلي زیاته کړه: «د کتابونو دغه ډول نندارتون باید هر وخت او هر کال باید جوړ شي، ځکه دا له یوې خوا ځوانان هڅوي چې مطالعې ته مخه کړي او له بلې خوا خلک هم خبریږي چې کوم کتابونه چاپ شوي.»
دې نندارتون ته د ختیځې سیمې ګڼ اوسېدونکي هم ورغلي وو. صفت الله مومند هم یو له دغه ګډونوالو دی هغه خوښ دی چې په لومړي ځل د کتابونو نندارتون جوړېږي او دوی په کې ګډون کوي. هغه زیاتوي: «ډیر خوشاله یم چې د کتابونو داسې یو نندارتون څخه لیدنه کوم دا ځوانانو ته د سولې او امن فکر ورکولای شي او هم ځوانان هڅیږي چې له جګړو یې مخه وګرځي او مطالعه وکړي.»
په همدې حال کې ولایتي چارواکي وایې، چې د مرکزي کتابتون د غني کېدو او په ادارو کې د اړونده مسلکي کتابتونونو د فعالیدو لپاره به هم هڅې وکړي. ټاکل شوې د کتابونو دا نندارتون به په خپله لمن کې د یو شمېر نورو پروګرامونو په ترسره کولو سره درې ورځې دوام وکړي.
