اطلاعات روز: د اعتراضي ښځو د خوځښتونو ايتلاف د دوحې د غونډې له جوړېدو او دې غونډې ته د طالبانو له ور بلنې سره مخالفت کړی او ويلي يې دې چې د دې ډلې ځای د «لاهې په محکمه کې دی، نه د دوحې په غونډه کې».
د ښځو دې ډلې نن (پنجشنبه، ۲۶ د سلواغې) په يوه سرپټي ځای کې د غونډې او اعلاميې خپرولو له لارې ويلي چې د ملګرو ملتونو په کوربتوب د افغانستان په اړه د هيوادونو د ځانګړو استازو غونډه تحريم او غندي.
د معترضو ښځو په اعلاميه کې راغلي چې په دوحه کې د راتلونکې غونډې اساس تعامل او د طالبانو لپاره لابي ده.
معترضو ښځو ويلي چې طالبان بايد د ترهګريزو بريدونو، وژنې، د بې ګناه خلګو د شکنجې، د ښځو د حقونو د پراخ نقض او د بشريت پر خلاف د جنايت له وجې محاکمه شي او د دې ډلې ځای د لاهې په جنايي محکمه کې دی.
دوی د ملګرو ملتونو له لوري د دوحې غونډې ته د طالبانو رابلل شرموونکي بللي.
همدا راز د معترضو ښځو په اعلاميه کې راغلي: «شرموونکې ده چې د بشري حقونو او ډيموکراسۍ د مدعي هيوادونو استازي د دوحې په غونډه کې لابي ګرۍ ته چمتو کېږي.»
معترضو ښځو ملګرو ملتونو او هيوادونو ته ويلي چې له طالبانو سره دې تعامل او مذاکره نه کوي او د دې پر ځای دې په افغانستان کې روان جنسيتي اپارتايډ په رسميت وپېژني او طالبان دې تحريم کړي.
سياسي جريانونو هم د دوحې په غونډه کې د طالبانو د حضور مخالفت کړی دی.
دې جريانونو نن د يوې ګډې اعلاميې له لارې ويلي چې د دوحې غونډې ته د طالبانو رابلل دې ډلې ته جسارت ورکوي چې نور هم خپلو تاوتريخجنو چلندونو ته دوام ورکړي.
د طالبانو مخالفو جريانونو له ملګرو ملتونو او د دوحې د غونډې له ګډون کوونکو غوښتي چې د افغانستان د ښکېلو سياسي اړخونو حضور ته د زمينې په برابرولو سره دې د دې فرصت برابر شي چې د ملي پروسې له لارې اوسنی وضعيت بدل او د افغانستان د خلګو د ارادې پر اساس د قانوني دولت جوړېدو ته زمينه برابره شي تر څو زموږ په هيواد کې روان کړکېچ پای ته ورسېږي.
ټاکل شوې ده چې د افغانستان په چارو کې د هيوادونو د ځانګړو استازو دويمه غونډه د روانې ميلادي مياشتې پر ۱۸ او ۱۹ نېټو په دوحه کې جوړه شي.
دا غونډه د ملګرو ملتونو د عمومي منشي آنتونيو ګوتريش په کوربتوب جوړېږي او د ملګرو ملتونو د امنيت شورا له ۲۷۲۱ پرېکړهليک سره سم پکې د «افغانستان د خپلواکې ارزونې» وړانديزونه ارزول کېږي.
د دې غونډې د جوړېدو موخه «د افغانستان د خپلواکې ارزونې سپارښتنو ته په پام په منسجمه، همغږې او ساختاري توګه د افغانستان په اړه د نړيوالې ښکېلتيا د زياتوالي د تګلارې پر څرنګوالي بحث» کول بلل شوي.
د ملګرو ملتونو د عمومي منشي له لوري د ځانګړي استازي ټاکل د دې غونډې د کار برخه ده.
طالبانو ته هم په دې غونډه کې د ګډون بلنه ورکړل شوې ده، خو هغوی خپل ګډون مشروط کړی دی.
