اطلاعات روز: په افغانستان کې د ايران سفير او د دې هيواد ځانګړي استازي حسن کاظمي قمي ويلي چې ګاونډي او د سیمې هيوادونه د افغانستان له ثبات سره د مرستې لپاره له طالبانو سره د همکارۍ او تعامل په لټه دي.
ده دا څرګندونې په دوحه کې د افغانستان په اړه د هيوادونو د استازو د غونډې په درشل کې د ايران له دولتي خبري اژانس ايرنا سره په خبرو کې کړې دي.
قمي ويلي: «نن تر بل هر وخت په زياته کچه ګاونډي او د سیمې هيوادونه په دې لټه کې دي چې له کابل سره د همکارۍ او تعامل له لارې د افغانستان له ثبات سره مرسته وکړي او داسې شرایط را منځ ته کړي چې په دې هيواد کې د رغونې دوره پيل شي.»
ده زياته کړې چې نن د افغانستان ګټې او مصالح د ګاونډيو او د سيمې د هيوادونو له مصالحو سره تړل شوي دي.
همدا راز دې ايراني ډيپلوماټ ټينګار کړی دی چې نړيواله ټولنه، ملګري ملتونه او امنيت شورا بايد «د افغانستان د سيمهييزې همکارۍ د ابتکار د غونډې» ملاتړ وکړي. دا غونډه يو څه وخت وړاندې د طالبانو د بهرنيو چارو د وزارت په کوربتوب په کابل کې جوړه شوه.
د قمي په وينا، د کابل په غونډه کې ګاونډيو او د سيمې هيوادونو د افغانستان د شرایطو د ښه کولو لپاره د مرستې کولو ته چمتووالی وښود.
دې ايراني ډیپلوماټ هيله ښوولې ده چې د دوحې په غونډه کې به رغنده خبرې او ښه توافقات وشي او د افغانستان د وضعيت له ښه والي سره به مرسته وکړي.
ټاکل شوې ده چې د افغانستان په چارو کې د هيوادونو د ځانګړو استازو دويمه غونډه د راتلونکې اونۍ د يکشنبې او دوشنبې په ورځو په دوحه کې جوړه شي.
دا غونډه د ملګرو ملتونو د عمومي منشي آنتونيو ګوتريش په کوربتوب جوړېږي او د ملګرو ملتونو د امنيت شورا له ۲۷۲۱ پرېکړهليک سره سم پکې د «افغانستان د خپلواکې ارزونې» وړانديزونه ارزول کېږي.
همدا راز په دې ناسته کې د هيوادونو ځانګړي استازي د افغانستان په چارو کې د ملګرو ملتونو د ځانګړي استازي د ټاکل کېدو په اړه بحث کوي.
طالبانو اعلان کړی چې دا ډله غونډې ته بلل شوې، خو تر اوسه يې پکې د ګډون په اړه پرېکړه نه ده کړې.
