اطلاعات روز: پنځو غير دولتي نړيوالو سازمانونو (انجيوګانو) په افغانستان کې د اقليمي وضعيت او وچکالۍ د بدتر کېدو په اړه خبرداری ورکړی دی.
دې سازمانونو په یوه ګډه اعلاميه کې ويلي، چې تر متوسطې کچې ګرم ژمی او د واورو کمښت په افغانستان کې د اقليمي شرایطو او وچکالۍ د بدتر کېدو نښې دي؛ هغه هیواد چې په تېرو ۳۰ کلونو کې یې ترټولو بده وچکالي تجربه کړې.
دا اعلاميه پرون دوشنبه (۱۶ د سلواغې) د لوږې پر خلاف د اقدام (ای سي ايف)، د نړیوالې روغتيايي ډلې (آی ايم سي)، په ټوله نړۍ کې اسلامي مرستې (آی آر ايم)، د نړیوالو ماشومانو ژغورنې (ايس سي آی) او ورلډ ويژن (ډبلیو وي آی) سازمانونو له لوري خپره شوې ده.
دې سازمانونو ويلي، چې په افغانستان کې تر اوسه ډېره کمه واوره وريدلې او اندېښنه داده چې تر پرلپسې درې کلنې وچکالۍ وروسته به د اوبو کمښت ادامه پيدا کوي او په دې هيواد کې به کړکېچونه نور هم ژور شي.
د دې سازمانونو په وينا، د ۲۰۲۳ د اکټوبر له لومړۍ او د ۲۰۲۴ د جنورۍ تر ۱۵مې پورې په افغانستان کې د تېرو کلونو په پرتله له ۴۵ څخه تر ۶۰ سلنې اوسط ورښت شوی دی. همدا راز کارپوهان وړاندوينه کوي چې د ۲۰۲۴ د فبروري او اپريل ترمنځ تر منځنۍ کچې د لوړې تودوخي شونتيا شته ده.
د دې پنځو غير دولتي سازمانو په اعلاميه کې راغلي چې کوم ماشومان او کورنۍ د ژوند له اړخه پر کرنې متکي دي، د زيات باران او واورې نه کېدو له کبله به په زياته کچه متضرر شي.
د دې سازمانونو په وينا، د نړيوالو ارزونو پر بنسټ د ۲۰۲۴ کال پر مهال به په افغانستان کې ۷.۸ ميليونه ماشومان د خوړو له کمښت سره مخ شي او که د وچکالۍ شرایط دوام وکړي نو د ماشومانو ژوند به له ګواښ سره مخ شي ځکه شونې ده چې کرنيز محصولات ختم شي او اقليمي بدلونونه نور هم ژور شي.
دې پنځو سازمانونو زياته کړې، چې د باران کمښت د اوبو له لارې د وبا په څېر د ساري ناروغيو د خپرېدو لپاره مناسب شرایط را پيدا کوي او فقر نور هم تشديدوي.
نړيوالو سازمانونو ويلي، چې له کړکېچ څخه ناورين ته د ماشومانو او کورنيو د تګ د مخنيوي لپاره بايدن نړيواله ټولنه د بشرپالې غبرګون طرح په بشپړه توګه له مالي اړخه تأمين کړي.
د دې سازمانونو په وينا، د ۲۰۲۳ کال پر مهال له ټولو بشرپالو اړتياوو يوازې ۴۵ سلنه د مرستندويانو له لوري تامین شوې.
د طالبانو تر واکمنېدو وروسته د افغانستان بشري کړکېچ نور هم تشديد شوی دی. ملګري ملتونه وايي، چې اوس مهال په افغانستان کې تر ۲۳ میليونه زيات وګړي مرستې ته اړتيا لري.
