اطلاعات روز: د ملګرو ملتونو پرمختيايي دفتر وايي چې افغانستان د انرژۍ له ستر کړکېچ سره مخ دی او د دې هيواد يوازې ۴۰ سلنه نفوس برېښنا ته لاسرسی لري.
د دې دفتر په وينا، د برېښنا کمښت د اړينو خدماتو لکه روغتيايي او زدکړييزو خدماتو پر وړاندې کولو، بشري مرستو، پرمختګ او اقتصادي ودې منفي اغېزې کړې دي.
د ملګرو ملتونو د پرمختيايي دفتر په راپور کې راغلي چې افغانستان د منځنۍ اسيا او ايران په څېر د ګاونډيو هيوادونو پر برېښنا متکي دی او خپله ۷۵ سلنه برېښنا له دې لارې پوره کوي.
له دې سره-سره دې دفتر ويلي، وارداتي برېښنا يوازې ۴۰ سلنه تقاضا پوره کوي.
د ملګرو ملتونو د پرمختيايي دفتر په وينا، د برېښنا عرضه د لوړې تقاضا لکه ژمي پر مهال کمه وي.
دې دفتر زياته کړې چې له پر له پسې هڅو سره-سره دا وضعيت نه دی حل شوی او ناروغان او زده کوونکي محدودې انرژۍ ته لاسرسی لري.
د ملګرو ملتونو د پرمختيايي دفتر په راپور کې راغلي چې کوم ولايتي روغتونونه د برېښنا له شبکې سره تړلي د ورځې پنځه يا شپږ ساعتونه او حتا ځيني وختونه ۱۲ ساعته برېښنا نه لري.
دې دفتر ويلي چې په افغانستان کې د انرژۍ له ننګونې سره د مبارزې لپاره يې د لمريزې برېښنا د توليد پروژه پيل کړې ده.
ويل شوي چې په روغتيايي او زدکړييزو بنسټونو کې د لمريزې برېښنا توليد د دې پروژې يوه برخه ده.
د ملګرو ملتونو پرمختيايي دفتر ويلي چې د ۲۰۲۳ کال پر مهال يې په کابل او کاپيسا ولايتونو کې په ۳۰ روغتيايي مرکزونو او ۱۵ ښوونځيو کې د لمريزې برېښنا سيسټمونه لګولي دي.
دې دفتر زياته کړې چې د لمريزې برېښنا سيسټمونه په پر له پسې توګه انرژي برابروي او په روغتيايي او زدکړييزو څانګو کې د ښو خدماتو د وړاندې کولو لامل کېږي.
همدا راز لمريزه انرژي د جنراتورونو لګښت کموي او د کاربن د خپرېدو مخه نيسي.
د ملګرو ملتونو پرمختيايي دفتر ويلي چې د عمومي خدماتو لپاره د انرژۍ له تأمين سره-سره يې د «ابادۍ» برنامې له لارې هغو ۶۶۰ کورنيو ته هم پاملرنه کړې چې د برېښنا له شبکې سره وصل نه وې.
د دې دفتر په وينا، په لمريزې برېښنا او لمريزو بخاريو سره د کورونو د سمبالولو له لارې د پيټرولو او له پخلي سره د تړلو سون توکو لګښت هم راکمېږي.
