اطلاعات روز: په خوست ولايت کې د طالبانو ولايتي مسوولين وايي چې له شاوخوا دوه نيم کلن ځنډ وروسته د راتلونکې جمعې په ورځ د خوست له هوايي ډګره د ملکي الوتنو لومړنی پرواز کېږي.
د خوست له ولايت مقام څخه په خپره شوې خبرپاڼه کې ويل شوي چې د اريانا افغان هوايي شرکت له خوا دا الوتنه متحده عربي اماراتو ته کېږي او په وينا يې چې تر دې وروسته به په نورمال ډول په اونۍ کې دوې الوتنې ياد هيواد ته کېږي.
همدا راز په خبرپاڼه کې ويل شوي چې د خوست له هوايي ډګره به د پکتيا او پکتيکا مساپر هم متحده اماراتو ته سفرونه کوي.
د يادو ولايتونو مساپر هم د الوتنو په پيلېدو خوښ دي او ارازنه او اسانه الوتنې يې ګڼي خو ورسره غوښتنه کوي چې له ياد ډګره دې نورو هيوادونو ته هم د پروازونو د پیلېدو هڅې وشي.
خوست هوايي ډګر د پخواني ولسمشر اشرف غني د دوهمې دورې ولسمشرۍ پر مهال د الوتنو لپاره ګټې اخيستنې ته وسپارل شو، خو د پخواني حکومت تر سقوط او واک ته د طالبانو تر رسېدو وروسته له دې هوايي ډګره الوتنې ځنډيدلې وې.
