اطلاعات روز: د افغانستان او هند تر منځ د درو شل اوريزو لوبو د لوبلړۍ په دويمه لوبه کې هند د افغانستان له لوري د ۱۷۳ منډو ورکړل شوی هدف په شپاړسم اور کې د څلورو ويکيټو په له لاسه ورکولو پوره کړ.
دا لوبه چې نن (يکشنبه، ۲۴ د مرغومې) د هند د مهاپردېش ایالت په انډور ښار کې وشوه، هند پکې د ټاس په ګټلو سره لومړی د توپ اچونې پرېکړه وکړه.
افغانستان په ټاکلو شلو اورونو کې د ټولو لوبغاړو په بايللو سره هند ته د ۱۷۳ منډو هدف ورکړ. د افغانستان له لورې ګلبدين نايب تر ټولو زياتې ۵۷ منډې وکړې.
د هند له لوري د توپ وهنې پيل بريدګر و او د پيل لوبغاړي جېسوال په ۳۴ توپونو ۶۸ منډې وکړې. همدا راز، د هند يوه بل لوبغاړي شيوام دوبي په ۳۲ توپونو ۶۳ تيزې منډې وکړې.
په افغان توپ اچوونکو کې فضل الحق فاروقي او نوين الحق يو – يو او کريم جنت دوه هندي لوبغاړی وسوځول.
د افغانستان او هند تر منځ د دې لوبلړۍ لومړۍ شل اوريزه لوبه د روانې جنوري مياشتې پر يوولسمه شوې وه چې هند د افغانستان له لوري د ۱۵۹ منډو ورکړل شوی هدف د څلورو لوبغاړو په له لاسه ورکولو سره پوره کړی و.
افغانستان به د روانې مياشتې پر ۱۷ نېټه د هند په بنګلورو ښار کې له هندۍ لوبډلې سره د لوبلړۍ وروستۍ شل اوريزه لوبه ولري.
