اطلاعات روز: د ناټو یا شمالي اتلانتیک تړون سازمان سرمنشي ینس سټولټنبرګ وایي چې ناټو ځواکونه افغانستان له مناسب وخت وړاندې نه پرېږدي.
نوموړي دغه خبرې د ناټو دفاع وزیرانو له ناستې یوه ورځ وړاندې کړې دي. دغه ناسته پام کې ده چې دوو ورځې چهارشنبه او پنجشنبه (۲۹ او ۳۰ د سلواغې) په انلاین بڼه ترسره شي.په دې ناسته کې په افغانستان او عراق کې د ناټو ماموریت ارزول کیږي.
د ناټو سرمنشي ویلي، د ناټو هېڅ متحد نه غواړي چې افغانستان کې له اړین وخت ډېر و اوسي، خو دا هېواد به له مناسب وخت وړاندې پرې هم نږدي.
سټولټنبرګ دغه راز ویلي چې ناټو له افغان سولې ملاتړ کوي او سولې ته تر رسېدو به د افغانستان له امنیتي ځواکونو هم ملاتړ ته دوام ورکړي.
د هغه په وینا، افغانستان کې د ناټو شتون سولې ته د ژمنې پر بنسټ منظم شوی دی. هغه په ورته وخت کې د افغانستان له دولت او طالبانو ډلې غوښتي چې له تاریخي راغلي فرصته دې ګټه واخلي او د سولې پروسه کې دې پرمختګ ګړندی کړي.
د ناټو سرمنشي دغه راز له طالبانو غوښتي چې تاوتریخوالی کم کړي او له نورو ترهګرو ډلو سره دې د اړیکو پرېکولو پر ژمنې عمل وکړي.
هغه د روان کال د سلواغې په ۲۹مه هم ولسمشر محمد اشرف غني سره په ټیلیفوني اړیکه کې پر خپل ټوېټر ولیکل چې د افغانستان په اړه د ناټو دریځ بدلون نه دی کړی او په افغانستان کې د دې سازمان د ځواکونو شتون به پر شرایطو ولاړ وي.
د امریکا او طالبانو د سولې تړون پر بنسټ ټاکل شوې وه چې بهرني ځواکونه د مې په میاشت کې افغانستان پرېږدي. طالبانو ژمنه کړې وه چې د القاعدې ډلې په ګډون به نورو ترهګرو ډلو سره اړیکې پرې کوي.
خو امریکایي او ناټو چارواکو وړاندې ویلي و چې طالبانو پر خپلو ژمنو عمل نه دی کړی. خو طالبانو بیا ویلي چې د دوحې هوکړې ته ژمن دي او پرې یې عمل کړی دی.
