اطلاعات روز: د طالبانو وياند ذبيح الله مجاهد وايي چې د دې ډلې د ادارو له لوري «د رسنيو قانون» نهايي شوی او د تاييد لپاره د طالبانو مشر هبت الله اخوندزاده ته لېږل شوی دی.
ښاغلي مجاهد په يوه غږيز پيغام کې چې نن (يکشنبه، ۱۷ د مرغومې) د طالبانو تر کنټرول لاندې ملي ټلويزون له لوري پر ايکس خپور شوی، ويلي چې هبت الله اخوندزاده تر اوسه دا قانون نه دی تایید کړی.
د طالبانو وياند وايي چې دا قانون د طالبانو په اطلاعاتو او کلتور وزارت کې په دوو مرحلو کې اروزل شوی او په درېيمه مرحله کې د دې ډلې د امر بالمعروف او نهی عن المنکر وزارت د سرپرست محمد خالد حنفي په مشرۍ د يوه پلاوي له لوري د «اسلامي احکامو له زاويې» ارزول شوی دی.
ښاغلي مجاهد زياته کړې چې بل ځل دا قانون د دې ډلې په عدليې وزارت کې هم د «اسلامي احکامو او قوانينو له اړخه» ارزول شوی او اصلاح شوی دی.
د طالبانو وياند وايي چې دا قانون اوس په کندهار کې د دې ډلې د مشر دفتر ته لېږل شوی او د قوانينو د زيات حجم له وجې لا هم نوبت نه دی رسېدلی چې هبت الله اخوندزاده يې وارزوي.
تر اوسه د دې قانون د منځپانګې په اړه جزييات نه دې خپاره شوي، خو داسې ښکاري چې طالبانو د پخواني حکومت د رسنيو قانون لغو کړی او يا هم لږ تر لږه يې پراخ بدلونونه پکې راوستلي دي.
طالبانو پر افغانستان تر بيا واکمنېدو وروسته پر رسنيو او خبريالانو پراخ محدوديتونه لګولي دي.
د افغانستان د خبريالانو مرکز وايي چې طالبانو د وروستيو دوو کلونو پر مهال رسنيو ته ۱۴ لارښودونه ورکړي او د رسنيو حقونه يې په شدت نقض کړي دي.
