اطلاعات روز: د ملګرو ملتونو د ماشومانو د ملاتړ صندوق (يونيسيف) ويلي چې د ۲۰۲۴ کال پر مهال په افغانستان کې د ۱۲.۶ ميليون ماشومانو په شمول ۲۳.۳ ميليون وګړي بشرپالو مرستو ته اړتيا لري.
يونيسيف نن (چهارشنبه، ۲۲ د ليندۍ) د يوې اعلاميې په خپرولو سره ويلي دي چې په افغانستان کې د ۱۹.۴ ميليون وګړو د بشرپالو او اساسي اړتياوو د تأمين په موخه ۱.۴ ميليارد ډالرو ته اړتيا ده.
د دې بنسټ په وينا، په افغانستان کې بشري کړکېچ د اوږدمهالې جګړې، سختو اقليمي ټکانونو او شديد اقتصادي ناورين له وجې پېښ شوی.
د يونيسيف په اعلاميه کې راغلي چې د زده کړې او کار په شمول د ژوند له ډېرو اړخونو د ښځو او نجونو شړلو په افغانستان کې بشري وضعيت بدتر کړی دی.
ملګرو ملتونو په نړۍ کې بشري کړکېچونو ته د رسيدګۍ په موخه د راتلونکې ميلادي کال پر مهال د ۴۶ ميليارد ډالرو بودجې غوښتنه کړې.
د ملګرو ملتونو د بشرپالو مرستو د همغږي کوونکي دفتر (اوچا) په وينا، افغانستان د هغو پنځو هيوادونو په منځ کې دی چې زياتې بشري مرستې ته اړتيا لري.
د اوچا په وينا، د راتلونکې ميلادي کال پر مهال په افغانستان کې د مرستې رسولو لپاره درې ميليارد ډالرو ته اړتيا ده.
دې دفتر د ۲۰۲۳ پر مهال د افغانستان لپاره د څلور ميليارد او شپږ ميليون ډالرو غوښتنه کړې وه، خو دا بودجه تر لاسه نشوه او د اوچا په وينا، د مالي تشې له امله له می تر نومبر مياشتې ۱۰ ميليون وګړو په افغانستان کې خوراکې مرستې له لاسه ورکړې.
