اطلاعات روز: د طالبانو وياند ذبيح الله مجاهد وايي چې د دې ډلې د وزيرانو شورا دوه ورځنۍ غونډه په کندهار ښار کې د هبت الله اخوندزاده په مشرۍ جوړه شوه.
ښاغلي مجاهد نن (چهارشنبه، ۱ د ليندۍ) د يوې اعلاميې په خپرولو سره ويلي چې دا غونډه د لړم پر ۲۸ او ۲۹ نېټو جوړه شوې ده.
د دې اعلاميې پر اساس، هبت الله اخوندزاده طالب چارواکو ته ويلي چې د دوی اصلي مسووليت د «شرعي موازينو پلي کول» او «خلګو ته خدمت» کول دي.
د طالبانو رهبر د دې ډلې چارواکو ته ويلي چې هره دوره تېرېږي او دوی بايد د زور پر ځای په هڅونه او ترغيب سره خلګ «دين او اسلامي اخلاقو» ته راوبولي.
ده همدا راز طالب چارواکو ته ويلي چې د پخواني حکومت له «بدنامو مسوولينو» دې «عبرت» واخلي او د «جهاد دورې» عادات دې نه هېروي.
د طالبانو وياند په خپله اعلاميه کې ويلي چې په دې غونډه کې د دې ډلې يو شمېر چارواکو خپل کاري راپورونه او فعاليتونه هم وړاندې کړي دي.
د دې اعلاميې پر اساس، په دې لړ کې د طالبانو د لومړي وزير اقتصادي مرستيال عبدالغني برادر او د طالبانو د سوداګرۍ او وزارت سرپرست نور الدين عزيزي ايران او پاکستان ته د خپل سفر په تړاو راپورونه وړاندې کړي.
په دې اعلاميه کې راغلي چې په دې غونډه کې د صادراتو، وارداتو، ترانزيټ او د روان کال د ژمي پر مهال پر وخت د سونتوکو او غذايي موادو د چمتووالي او تحويل په تړاو بحثونه او پرېکړي شوې دي.
په دې غونډه کې د افغانستان د مرکزي بانک لپاره د طالبانو سرپرست هدايت الله بدري او د دې ډلې د لومړي وزير اداري مرستيال د افغانستان د پولي واحد د ثبات او له پاکستانه د کډوالو او پناه غوښتونکو د راستنېدو په اړه راپور ورکړی.
د طالبانو د وياند په اعلاميه کې راغلي چې هبت الله اخوندزاده د دې ډلې ټولو چارواکو ته امر کړی چې له پاکستانه راستنېدونکو کډوالو او پناه غوښتونکو ته رسيدګۍ ته دې لومړيتوب ورکړي.
په دې اعلاميه کې همدا راز راغلي چې د دې دوې ورځنۍ غونډې پر مهال طالب چارواکو له ګاونډيو او نورو هيوادونو سره د اړيکو پر پراختيا او په هيواد کې د روان سياسي وضعيت او ستونزو په تړاو بحثونه کړي دي.
په دې اعلاميه کې راغلي چې د «رغنده سياستونو» د تطبيق لپاره د طالبانو د بهرنيو چارو وزارت په سرپرستۍ سياسي کميسيون ته دنده سپارل شوې چې د دې ډلې کورنۍ او بهرنۍ تګلاره دې برابره کړي.
طالب چارواکو په دې غونډه کې پر عصري او ديني زده کړو هم بحث کړی دی، خو د دې ډلې په اعلاميه کې د ښځو او نجونو زده کړو ته اشاره نه ده شوې.
د طالبانو د وياند په اعلاميه کې د هبت الله اخوندزاده په مشرۍ د دې ډلې د وزيرانو شورا د دوې ورځنۍ غونډې د پرېکړو په اړه جزييات نه دې خپاره شوي.
پر افغانستان د طالبانو له دويم ځل واکمنېدو راهيسې، دا لومړی ځل دی چې د دې ډلې د کابينې غړي په کندهار کې غونډه کوي.
طالبان وايي چې د دې ډلې مشر هبت الله اخوندزاده په کندهار کې مېشت دی او د دې ښار په بېلابېلو برخو کې فرمانونه او امرونه ورکوي.
د طالبانو عمومي وياند ذبيح الله مجاهد هم تر اوسه په کندهار کې مېشت دی او د دې ډلې رسمي اعلاميې له همدې ښاره خپروي.
