اطلاعات روز: د لوګر ولايت لپاره د طالبانو د کرنې، اوبو لګولو او مالدارۍ رياست مسوولين وايي، په دغه ولايت کې په لومړي ځل د کبانو روزنې لپاره پر دوه جريبه ځمکه د يو لوی فارم د جوړېدو کار پېل شوی دی.
دوی زياته کړې چې په دې وروستيو کې د کبانو روزنې برخې ته د لوګر د اوسېدونکو لېوالتيا ډېره شوې او دا لومړی ځل دی چې د درې ميليونه افغانيو په ارزښت په کې د یوه ساختماني شرکت له خوا فارم جوړيږي.
د کبانو روزونکي وايي، که اړونده ادارې ورسره په دې برخه کې همکاري وکړي نو دغه ولايت به د کبانو په يو توليدي ولايت بدل او شته اړتياوې به پوره کړل شي.
دوی د دې لپاره د تخمونو، مناسبو ځايونو د جوړېدو او خوراک برخه کې د کرنې رياست همکاري اړينه بولي.
د دغه ولايت اوسېدونکی نور ولي وايي، لوګر ته له کابل او نورو ختيځو ولايتونو کبان د خرڅلاو لپاره راوړل کېږي چې د زياتې مودې په تېرېدو يې د غوښې کيفيت خورا ټيټ وي، نوموړی زياتوي چې د دې فارم په جوړېدو سره به نه يوازې بې روزګاره ځوانانو ته د کار زمينه برابره شي، بلکې خلکو ته به تازه غوښه هم وړاندې کېږي.
لوګر يو له کرنيزو ولايتونو ګڼل کېږي، خو دا اول ځل دی چې په کې یو شمیر کسان د کبانو روزنې ته ملا تړي.
